Мінулай ноччу з рознымі траўмамі шпіталізавалі 51 чалавека, паведаміла Міністэрства здароўя.
Асноўныя траўмы — удары мяккіх тканак, траўмы канцавін, грудной клеткі, жывата і г. д.
Некалькім пацыентам зрабілі апэрацыі. Іхні стан стабілізавалі.
Загінулых, а таксама пацыентаў у крытычным стане сёньня няма.
ГЛЯДЗІЦЕ ТАКСАМА: «Было страшна, калі на мяне накіравалі стрэльбу». Што кажуць удзельнікі пратэстаў у МенскуУ Менску і яшчэ больш як у дзесяці гарадах Беларусі трэці дзень працягваюцца масавыя пратэсты ў сувязі з абвяшчэньнем Аляксандра Лукашэнкі пераможцам прэзыдэнцкіх выбараў. Найбольш масавыя пратэсты праходзяць у сталіцы. 11 жніўня эпіцэнтры супраціву перайшлі ў больш аддаленыя раёны гораду: Уручча, Каменную Горку, Серабранку, парку Паўлава.
У Каменнай Горцы і Серабранцы дэманстранты перагароджвалі вуліцы, спрабавалі збудаваць барыкады са спадручных сродкаў, якія сілавікі хутка разьбіралі. Гучалі шматлікія выбухі шумавых гранатаў, страляніна чэргамі, людзі ў адказ запускалі фаервэркамі, кідалі з вокнаў дамоў бутэлькі з вадой. АМАП разганяў дэманстрантаў на вуліцах і ў дварах.
Ва Ўруччы і на Каменнай Горцы, паведамлялі пра «мэтавыя» жорсткія затрыманьні і зьбіваньні матацыклістаў і кіроўцаў аўтамабіляў, у тым ліку з элемэнтамі пагоні. Таксама матацыклістаў затрымлівалі ў цэнтры гораду. У Каменнай Горцы паведамлялі, што сілавікі стралялі прыцэльна па вокнах гумовымі кулямі. Як і ў папярэднія дні, затрымлівалі і зьбівалі журналістаў, адбіралі карты памяці.
ГЛЯДЗІЦЕ ТАКСАМА: Выбары-2020. Пратэсты, затрыманьні і салідарнасьць. Што адбываецца ў Беларусі