Мэр літоўскай Палангі Шарунас Вайткус заклікаў гараджанаў далучыцца да акцыі «Балтыйскі шлях» і u'тым падтрымаць беларусаў у змаганьні з дыктатурай. У «ланцуг» плянуюць стаць ад мора і да самай мяжы зь Беларусьсю.
Канцэртная заля Палангі напярэдадні падзеі расфарбавалася ў бел-чырвона-белыя колеры беларускага мірнага супраціву.
«У нядзелю 23 жніўня далучаемся да жывога „ланцуга салідарнасьці“, напісаў гораданачальнік на сваёй старонцы ў Фэйсбуку . — Давайце пакажам адзінства ня толькі з латыскімі і эстонскімі братамі, але і з суседняй Беларусьсю, якая ў цяперашні час актыўна змагаецца за дэмакратыю у сваёй краіне».
ГЛЯДЗІЦЕ ТАКСАМА: Крaмлёўская тактыка гібрыднай агрэсіі: 80 гадоў таму СССР акупаваў краіны Балтыі23 жніўня 1989 году адбылася беспрэцэдэнтная акцыя «Балтыйскі шлях». Тады літоўцы, латышы і эстонцы сталі ў ланцуг даўжынёй парадку 670 км, злучыўшы Талін, Рыгу і Вільню. Такім чынам грамадзяне прадэманстравалі волю да незалежнасьці ад СССР.
Мэр Палангі Шарунас Вайткус
Цяперашняя акцыя будзе прысьвечана Беларусі. Паводле Шарунаса Вайткуса, каб забяспечыць сацыяльную адлегласьць, удзельнікі жывога ланцуга возьмуцца не за рукі, а будуць трымаць сьцягі Літвы, Латвіі, Эстоніі і Беларусі.
ГЛЯДЗІЦЕ ТАКСАМА: Вільня падтрымала беларусаў чатырма бел-чырвона-белымі мастамі«Давайце пакажам усім, што мы адзіныя, што мы цэнім і шануем нашу свабоду, якую мы заваявалі, а таксама падтрымаем беларусаў, якія змагаюцца за дэмакратыю. Запрашаем прыходзіць са сьцягамі ды іншымі атрыбутамі», — заклікаў мэр Палангі.
Аналягічную імпрэзу зьбіраюцца правесьці ў Латвіі: шэраг людзей стане ад марскога курорту Юрмалы да беларускай мяжы.