Расейскі апазыцыянэр Аляксей Навальны стаў ахвярай узьдзеяньня таксычнага рэчыва з групы інгібітараў холінэстэразы. Пра гэта заявіла ў панядзелак бэрлінская клініка Charite, дзе Навальны праходзіць лячэньне.
У паведамленьні пад загалоўкам «Клінічныя дадзеныя паказваюць на атручэньне Аляксея Навальнага», апублікаваным на сайце клінікі, гаворыцца, што «клінічныя дадзеныя паказваюць на інтаксыкацыю рэчывам з групы актыўных рэчываў, якія зьяўляюцца інгібітарамі холінэстэразы». Канкрэтнае рэчыва яшчэ невядомае. У паведамленьні падкрэсьліваецца, што наяўнасьць інгібітару холінэстэразы ў арганізьме была даказаная некалькі разоў у незалежных лябараторыях.
🇬🇧1/4 Alexei #Navalny is being treated in intensive care at #charitéberlin and remains in medically induced coma. While his condition is serious, it is not currently life-threatening. Following his admission, Mr. Navalny underwent extensive examination by a team of Charité...
— Charité - Universitätsmedizin Berlin (@ChariteBerlin) August 24, 2020
«Згодна з дыягназам, пацыенту прызначаюць антыдот атрапіну. Хада хваробы застаецца незразумелай, і нельга выключаць доўгатэрміновыя наступствы, асабліва адносна нэрвовай сыстэмы», — гаворыцца ў паведамленьні. У ім таксама сказана, што Навальны па-ранейшаму ў рэанімацыі ў стане штучнай комы, але цяпер сур’ёзнай небясьпекі для яго жыцьця няма.
«Дактары, якія лечаць Навальнага, знаходзяцца ў шчыльным кантакце з жонкай Аляксея Навальнага. Па ўзгадненьні зь ёй Charite зыходзіць з таго, што гэтае публічнае паведамленьне пра стан яго здароўя адпавядае яго інтарэсам», — гаворыцца ў паведамленьні.
Навальны адчуў сябе кепска раніцай 20 жніўня ў самалёце Томск — Масква. Двое сутак ён правёў у рэанімацыі ў Омску, дзе самалёт зрабіў экстраную пасадку. Раніцай у суботу яго перавезьлі ў Бэрлін. Паплечнікі Навальнага ад самага пачатку сьцьвярджалі, што апазыцыянэра атруцілі; мэдыкі, якія лячылі яго ў Омску, заяўлялі аб парушэньні абмену рэчываў, не называючы яго прычынаў.
То, что Алексея отравили, утверждалось нами с самого начала, несмотря на заявления омских врачей и государственных пропагандистов. Теперь наши слова подтверждены анализами в независимых лабораториях. Отравление Навального больше не гипотеза, а факт.
— Кира Ярмыш (@Kira_Yarmysh) August 24, 2020