Пра затрыманьне Кудзіна на сваёй старонцы ў Instagram паведаміў Беларускі фонд спартовай салідарнасьці. Яшчэ на 19 лістапада ў маладэчанскім судзе прызначылі першае пасяджэньне ў справе байца, аднак Аляксей Кудзін у суд не прыехаў, пасьля чаго быў абвешчаны ў вышук.
Пазьней спартовец напісаў у інтэрнэце, што зьехаў зь Беларусі. Пра яго пляны пакінуць краіну ня ведала нават жонка.
ГЛЯДЗІЦЕ ТАКСАМА: Чэмпіён сьвету па кікбоксінгу і тайскім боксе пакінуў Беларусь з прычыны крымінальнага перасьледуБеларускі фонд спартовай салідарнасьці ў паведамленьні пра затрыманьне Кудзіна папрасіў грамадзкай падтрымкі, бо ў выпадку экстрадыцыі з Расеі ў Беларусь яго могуць чакаць «катаваньні, рэпрэсіі і нават сьмерць».
Кудзіна затрымалі на акцыі пратэсту недалёка ад маладачанскага гарадзкога парку 10 жніўня. Адпусьцілі 21 жніўня, пачаўшы супраць байца крымінальную справу і выбраўшы меру стрыманьня ў выглядзе хатняга арышту. Яго абвінавачваюць паводле артыкулу 363 Крымінальнага кодэксу («Супраціў супрацоўніку органаў унутраных спраў або іншай асобе, якая ахоўвае грамадзкі парадак»).
Па гэтым артыкуле мужчыну пагражае да 5 гадоў пазбаўленьня волі.
Аляксей Кудзін — заслужаны майстар спорту Беларусі, чэмпіён сьвету ў тайскім боксе сярод аматараў і ў кікбоксінгу сярод прафэсіяналаў.
ГЛЯДЗІЦЕ ТАКСАМА: «Лёха, нам сказалі, ты мянта заваліў». Чэмпіён сьвету расказаў, чаму зьехаў зь Беларусі ГЛЯДЗІЦЕ ТАКСАМА: У Маладэчне судзяць хлопца, які на працэсе заявіў, што 11 жніўня міліцыянты пагражалі яму згвалтаваньнем