Праваабаронцам вядома 25 прозьвішчаў затрыманых у менскіх мікрараёнах Лебядзіны і Новая Баравая

Найбольш масавыя затрыманьні адбыліся ў менскіх мікрараёнах Лебядзіны і Новая Баравая, дзе да людзей прыходзілі ў кватэры або затрымлівалі на вуліцы.

Паводле тэлеграм-каналу валянтэраў «Списки задержанных», у Менску такім чынам затрымалі 25 чалавек.

Увечары 10 сакавіка некалькі тэлеграм-каналаў паведамілі, што ў Новай Баравой у сераду адбыліся аблавы ў дамах. Людзі ў масках узломвалі кватэры і забіралі людзей. Раніцай хапалі людзей на вуліцы Авіяцыйнай, а ўвечары на вуліцы Мікаяна.

«Паводле якога прынцыпу выбіраюць, складана сказаць. Як мяркуецца, прыходзяць да тых, у каго віселі сьцягі яшчэ ўвосень. Пры адмове адчыніць узломваюць дзьверы, тварам у падлогу. Плюс адміністрацыйны арышт за непадпарадкаваньне. Далей ператрус, тэхніку канфіскоўваюць. Што цікава прыходзяць, па сутнасьці, дзеці. Хутчэй за ўсё, ўчорашнія выпускнікі. Што, дарэчы, і відаць на фатаздымках», — напісаў чытач Свабоды.