У цэнтры Рыгі ўсталяваныя сьцягі краінаў-удзельніц чэмпіянату. Сёньня мэр Рыгі Мартыньш Стакіс разам зь міністрам замежных спраў Латвіі Эдгарсам Рынкевічсам замянілі дзяржаўны сьцяг Беларусі на бел-чырвона-белы з Пагоняй.
«Сярод сьцягоў чэмпіянату па хакеі мы падымаем сьцяг Свабоднай Беларусі! Гэты сьцяг мне даверылі палітычныя ўцекачы зь Беларусі. Сьцяг, які сымбалізуе рэжым, які ажыцьцяўляе дзяржаўны тэрарызм, недарэчны ў гарадзкім асяродзьдзі Рыгі — таму мы яго зьнялі!» — напісаў мэр Рыгі ў сябе ў Twitter.
Пасьля гэтага амбасадара Латвіі ў Беларусі выклікалі ў Міністэрства замежных спраў Беларусі. Ці зьвязаны выклік з заменай сьцягу, пакуль не вядома.
⬜🟥⬜Among the flags of the hockey championship, we raise the flag of free Belarus! This flag was entrusted to me by political refugees from Belarus. A flag symbolizing a regime engaged in state terrorism does not belong in Riga – so we took it down! #FreeBelarus #ЖывеБеларусь pic.twitter.com/bd8MPiQxxS
— Mārtiņš Staķis (@MStakis) May 24, 2021
Тым часам да амбасады Латвіі ў Менску прыйшлі «неабыякавыя беларусы», каб выказаць пратэст «супраць ўмяшаньня ва ўнутраныя справы краіны», паведамляюць афіцыйныя мэдыі.
Старшыня Лібэральна-дэмакратычнай партыі Алег Гайдукевіч прыгразіў, што ягоныя паплечнікі будуць стаяць, колькі спатрэбіцца — тыдзень, месяц. Але не дазволяць «займацца самаўпраўствам».
У руках пратэстоўцаў знаёмыя прапагандысцкія лёзунгі — «Любімую не аддаюць», «Не дазволім разваліць краіну» ды іншыя.