Пасьля пасадкі Крысьціна Ціманоўская ня выйшла ў залю прыбыцьця, дзе яе чакалі дзясяткі журналістаў і людзі, якія прыйшлі прывітаць яе і выказаць салідарнасьць зь ёю.
Як паведаміла агенцтва Associated Press, самалёт, у якім Ціманоўская прыляцела зь Вены, быў адтранспартаваны да асобнага будынку на лётнішчы, празь які выходзяць урадавыя дэлегацыі. Пасажыры, якія ляцелі разам зь ёй, паведамілі карэспандэнту, што калі ўсе выйшлі з самалёта і селі ў аўтобус, на борце заставалася адна маладая жанчына.
Праз 40 хвілін пасьля пасадкі кіраўнік беларускага Нацыянальнага антыкрызіснага кіраўніцтва Павал Латушка апублікаваў у сацыяльных сетках інфармацыю, што спартоўка ўжо ў Варшаве, і зьмясьціў сваю фатаграфію зь ёй.
We are glad that Kristina Timanovskaya managed to get to Warsaw safely!We hope that the agony of the regime will soon end, and Kristina will be able to return to conquering new sports peaks in the New Belarus! #FreeBelarus⚪️🔴⚪️ pic.twitter.com/DbwThQlH93
— Pavel Latushka (@PavelLatushka) August 4, 2021
«На жаль, у Крысьціны Ціманоўскай не было магчымасьці пасьля прылёту ў Варшаву выйсьці да тых, хто чакаў яе ў аэрапорце. Гэта зьвязана выключна зь мерамі бясьпекі, якія вызначае краіна, што яе прымае. Спадзяемся на разуменьне», — напісаў Павал Латушка.
Раней сёньня Крысьціна Ціманоўская зрабіла перасадку ў аўстрыйскай сталіцы, у аэрапорце яе сустрэў дзяржаўны сакратар міністэрства навакольнага асяродзьдзя Аўстрыі Магнус Брунэр.
Крысьціна Ціманоўская раней атрымала польскую гуманітарную візу. Да адлёту з Токіё яна знаходзілася ў амбасадзе Польшчы ў японскай сталіцы.
Першапачаткова меркавалася, што зь Японіі яна вылеціць адразу ў Польшчу, але маршрут яе падарожжа быў зьменены зь меркаваньняў бясьпекі.
Яе муж Арсень Зданевіч таксама атрымаў польскую гуманітарную візу, у інтэрвію Свабодзе ён пацьвердзіў атрыманьне візы і сказаў, што пакуль яшчэ знаходзіцца ў Кіеве і ня будзе агучваць, калі зьбіраецца ў Польшчу, — «дзеля сваёй жа бясьпекі».
Крысьціна Ціманоўская і яе адмова вяртацца ў Беларусь
- 1 жніўня 2021 году падчас Алімпіяды 24-гадовая лёгкаатлетка Крысьціна Ціманоўская заявіла, што яе спрабавалі сілай вывезьці з Токіё ў Беларусь. Яна адмовілася ад пасадкі на самалёт і заявіла, што ў аэрапорт яе даставілі супраць волі.
- Ціманоўскую выключылі з алімпійскай каманды пасьля таго, як яна выступіла з крытыкай трэнэрскага складу ў сваім Instagram. Яе паставілі бегчы эстафэту 4×400 мэтраў, хоць на Алімпіядзе Крысьціна рыхтавалася выступіць у бегу на 100 і 200 мэтраў.
- Гэта здарылася пасьля таго, як Марыю Жодзік, Ганну Міхайлаву і Крысьціну Мулярчык не дапусьцілі да эстафэты з прычыны недастатковай колькасьці допінг-пробаў. Жодзік абвінаваціла ў гэтым Беларускую фэдэрацыю лёгкай атлетыкі. Ціманоўская, у сваю чаргу, заявіла, што ніколі ня бегала дыстанцыю, на якую яе без папярэджаньня выстаўляе трэнэрскі штаб.
- Неўзабаве пачаліся пагрозы ад адміністрацыі каманды і галоўнага трэнэра зборнай у лёгкай атлетыцы Юрыя Маісевіча. Функцыянэры спачатку ігнаравалі пытаньні Ціманоўскай наконт удзелу ў няпрофільнай для яе эстафэце, куды атлетку ўключылі безь яе згоды, а затым пачалі пагражаць, заяўляючы, што рашэньне пра яе «выдаленьне з Алімпіяды» прынятае «на самым версе». Крысьціна апублікавала, а потым выдаліла аўдыязапіс з пагрозамі.
- Ціманоўская заявіла, што ў Беларусь ня вернецца, бо баіцца перасьледу. 2 жніўня яна прыйшла ў польскую амбасаду, дзе ёй выдалі гуманітарную візу. У той жа дзень стала вядома, што яе муж Арсень Зданевіч зьехаў зь Беларусі ва Ўкраіну.
- Трэцяга жніўня Ціманоўская з Токіё паразмаўляла з прэм’ер-міністрам Польшчы Матэвушам Маравецкім.
- 4 жніўня быў заплянаваны пералёт спартоўкі ў Варшаву, у апошні момант зь меркаваньняў бясьпекі Варшаву зьмянілі на Вену. У аэрапорце Токіё перад вылетам у Аўстрыю Ціманоўская зьявілася ў суправаджэньні афіцэраў японскай паліцыі.
- 5 жніўня Ціманоўская прыбыла ў Варшаву і дала прэсавую канфэрэнцыю.
- 6 жніўня Міжнародны алімпійскі камітэт паведаміў, што «ў інтарэсах дабрабыту спартоўцаў Беларусі» скасаваў акрэдытацыю двух трэнэраў Ціманоўскай, Артура Шумака і Юрыя Маісевіча, і пачаў расьсьледаваньне інцыдэнту.
- 10 жніўня Крысьціна Ціманоўская падпісала кантракт са спартовай групай Orlen. У польскай камандзе адзначылі, што спадзяюцца на хуткае аднаўленьне кар’еры беларускі.