Склад рады абнавіўся напалову. Пра гэта паведаміла паўночнакарэйскае Цэнтральнае тэлеграфнае агенцтва (ЦТАК).
Перастаноўкі зробленыя ў часе сэсіі Вярхоўнага народнага сходу КНДР. Зь Дзяржаўнай рады выдаленыя 9 чалавек. Сярод іх – 82-гадовы Пак Пон Джу, якога звалі эканамічным дарадцам Кіма. Палітык двойчы займаў пасаду кіраўніка ўраду КНДР і лічыўся пратэжэ дзядзькі Кім Чэн Ына — Чан Сон Тхэка, пакаранага сьмерцю ў 2013 годзе.
У склад дзяржрады ўключаны генэрал арміі, сакратар ЦК кіруючай Працоўнай партыі Карэі Пак Чон Чхон. Некалькі дзён таму ён, паводле афіцыйных паведамленьняў, прысутнічаў пры першым выпрабаваньні паўночнакарэйскай гіпэргукавой ракеты.
Зь дзяржрады афіцыйна выключаныя некалькі партыйных дзеячоў, якіх раней зьнялі з партыйных пасадаў. У цэлым, паведамляе ўрадавае агенцтва, пасяджэньне прайшло «ў абстаноўцы надзвычайнай рэвалюцыйнай сьвядомасьці і энтузіязму ўдзельнікаў».
Чаму важныя новыя пасады Кім Ё Чжон
У жніўні 2020 году стала вядома, што Кім Чэн Ын перадаў Кім Ё Чжон частку сваіх абавязкаў, фактычна зрабіўшы яе другім чалавекам у дзяржаве. Сястра вярхоўнага лідэра — адзіны публічны палітык у КНДР, за выключэньнем свайго брата, адзначаў у эфіры Радыё Свабода прафэсар унівэрсытэту Кунмін у Сэуле Андрэй Ланькоў.
Яе лічаць найбольш верагодным пераемнікам брата на пасадзе вярхоўнага лідэра КНДР у выпадку ягонай сьмерці. Аднак у патрыярхальным грамадзтве Паўночнай Карэі супраць яе гуляюць яе маладосьць і гендэр.
У 2020 годзе Кім Ё Чжон анансавала зьнішчэньне вузла пастаяннай сувязі паміж КНДР і Паўднёвай Карэяй. Яе прасоўваньне супала па часе з заявай Кім Чэн Ына пра аднаўленьне каналаў сувязі на пачатку кастрычніка.
У канцы верасьня Кім Ё Чжон заявіла, што КНДР гатовая абвясьціць аб афіцыйным спыненьні карэйскай вайны, у стане якой дзьве Карэі афіцыйна знаходзяцца з 50-х гадоў XX стагодзьдзя. «На Поўдні адчуваецца непераадольна моцнае жаданьне вывесьці міжкарэйскія адносіны з тупіку і як мага хутчэй дасягнуць стабільнасьці. У нас ёсьць такое ж жаданьне», — цытавала ЦТАК яе заяву.