«30 верасьня КНДР зрабіла выпрабавальны запуск новай распрацоўкі — зэнітнай ракеты», — паведаміла Цэнтральнае тэлеграфнае агенцтва Карэі (ЦТАК).
Як гаворыцца ў паведамленьні ЦТАК, выпрабаваньне, праведзенае паўночнакарэйскай Акадэміяй абаронных навук, павінна было пацьвердзіць практычную функцыянальнасьць пускавой устаноўкі, радараў, комплекснай машыны баявога кіраваньня і баявых характарыстык ракеты.
Мяркуючы па ўсім, паўночнакарэйскі лідэр Кім Чэн Ын не прысутнічаў на выпрабаваньнях, за якімі замест яго назіраў Пак Чжон Чон, член Палітбюро і Цэнтральнага камітэту кіроўнай партыі КНДР .
«Выпрабаваньне мела вельмі практычнае значэньне для вывучэньня і распрацоўкі розных пэрспэктыўных зэнітна-ракетных сыстэм», — гаворыцца ў паведамленьні ЦТАК.
ГЛЯДЗІЦЕ ТАКСАМА: Паўночная Карэя запусьціла дзьве балістычныя ракеты ў мораУ сераду ЦТАК заявіла пра пасьпяховы выпрабавальны запуск яшчэ аднаго новага віду ўзбраеньняў, распрацаванага ў Паўночнай Карэі, — гіпэргукавой ракеты.
Паўднёвакарэйскія вайскоўцы раней паведамлялі, што Паўночная Карэя запусьціла ракету ў бок мора са свайго ўсходняга ўзьбярэжжа.
Як гаварылася ў паведамленьні ЦТАК, новая распрацоўка «павялічвае абароназдольнасьць» Паўночнай Карэі, а гіпэргукавая ракета ўяўляе сабой «стратэгічны від узбраеньня».
У сераду агенцтва France-Presse са спасылкай на крыніцы ў дыпляматычных колах паведаміла, што Рада Бясьпекі ААН зьбярэцца ў чацьвер на пазачарговую сэсію, каб абмеркаваць сытуацыю ў Паўночнай Карэі і заяву аб выпрабаваньні гіпэргукавой зброі.