«Мы можам гарантаваць гэтым людзям беспакаранасьць, калі ім пагражае крымінальны перасьлед», – сказаў прэм'ер-міністар Чэхіі Пэтр Фіяла пасьля сустрэчы з прэзыдэнтам краіны Мілашам Зэманам.
Адсутнасьць пакараньня будзе гарантаваная ў выглядзе зьняцьця адказнасьці, прадстаўленай прэзыдэнтам за подпісам прэмʼер-міністра.
За наёмніцтва ва ўзброеных сілах іншай краіны, паводле чэскага заканадаўства, пагражае пяцігадовы тэрмін зьняволеньня.
Міністар замежных спраў Вялікабрытаніі Ліз Трас падкрэсьліла ў інтэрвію Бі-бі-сі, што калі нехта з брытанцаў захоча адгукнуцца на заклік прэзыдэнта Зяленскага прыехаць ваяваць добраахвотна ў прыватным парадку, то гэтыя людзі маюць права прыняць такое рашэньне. Пры гэтым адпраўляць ва Ўкраіну сваіх салдат для ўдзелу ў баявых дзеяньнях Брытанія ня мае намеру.
Сёньня ўрад Эстоніі прыняў пастанову, якая забараняе жыхарам гэтай краіны ваяваць на баку Расеі і Беларусі. Міністар юстыцыі Эстоніі Марыс Лаўры паведаміла, што калі нехта адправіцца ваяваць на баку Расеі і Беларусі, то размова будзе ісьці аб ваенным злачынстве.