Пра гэта ў інтэрвію тэлеканалу ТСН заявіў камандуючы ўзброенымі сіламі ЗША ў Эўропе генэрал Бэн Годжэс. Сярод іншага ён адзначыў, што Расея не дасягнула ніводнай мэты пры ўварваньні.
«Пуцін не дасягнуў ніводнай сваёй мэты. Барацьба ўкраінскіх салдат і ўкраінскага народа, тое, як яны змагаюцца, вызначае гэты супраціў. Расейцы правалілі ўсе свае мэты. Нават сёньня, праз 5 тыдняў, яны так і не захапілі Марыюпаль, які павінен быў стаць першым горадам, які ўпаў, улічваючы ўсе перавагі, якія мелі расейцы. Не атрымалася. І, вядома, часткова гэта зьвязана зь няправільнымі разьлікамі, памылкамі і цаной, якую яны павінны заплаціць. Таму Крэмль абвясьціў аб заканчэньні „першай фазы“, а цяпер аб пачатку „другой фазы“, што, вядома ж, ёсьць абсалютнымі казкамі. Яны ня могуць прызнаць, што пацярпелі няўдачу, таму цяпер трэба ісьці на нешта іншае. Але гэта ня будзе доўжыцца вечна».
Дапамога Ўкраіне мусіць дастаўляцца апэратыўна. Заходнія партнэры павінны разумець важнасьць гістарычнага шанцу. Годжэс удакладніў, што Ўкраіну неабходна забясьпечыць узбраеньнем, якое дапаможа зьнішчыць ракеты вялікай далёкасьці, артылерыю далёкага дзеяньня, караблі і самалёты, зь якіх запускаюцца крылатыя ракеты.
«Калі мы не дапаможам, расейцы пачнуць аднаўляцца, падвозіць боепрыпасы, яны зразумеюць, што робяць ня так, і зробяць спробы новага наступу. Таму зараз мы знаходзімся на вострай стадыі гэтай кампаніі», — сказаў ён.
ГЛЯДЗІЦЕ ТАКСАМА: Былы амбасадар ЗША ў Расеі Макфол — пра тры сцэнары завяршэньня вайныЁн адзначыў, што расейская армія, безумоўна, неэфэктыўная, але ў яе яшчэ ёсьць ядзерная зброя, шмат магчымасьцяў, тысячы салдат.
«Таму мы павінны скарыстацца магчымасьцю цяпер, пакуль яны зазналі няўдач. У адваротным выпадку нам давядзецца зноў мець справу з гэтым праз 2-3 гады. Таму мы павінны гаварыць аб перамозе зараз. Няма чаго абмяркоўваць. Прыярытэт перамагчы — аднавіць сувэрэнітэт Украіны. І гэта павінна быць мэтай ЗША і Эўропы — дапамагчы Ўкраіне аднавіць свой сувэрэнітэт. Тады мы можам гаварыць з пазыцыі сілы», — сказаў Годжэс.
ГЛЯДЗІЦЕ ТАКСАМА: Уладзімір Зяленскі: «Хто кіруе эўраатлянтычнай супольнасьцю? Масква ўсё яшчэ праз запалохваньне?»Адказаў Бэн Годжэс і на пытаньне, як ён расцэньвае імавернасьць далучэньня да вайны беларускіх войскаў. Ён мяркуе, што дзеяньні Лукашэнкі шмат у чым цяпер абумоўлены ціскам Крамля.
«Я б сказаў, што такая магчымасьць ёсьць. Лукашэнка — нелегітымны лідэр. У гэтым няма ніякіх сумненьняў. Ніхто ў сьвеце ня верыць, што яго абраньне было легітымным. Але ён цяпер ва ўладзе, у атачэньні сілавікоў. Але я думаю, што нават ён бачыць, што невялікая частка войскаў зь Беларусі будзе зьнішчана, і ён страціць нават тое. Таму ён спрабуе дазволіць Расеі дзейнічаць з тэрыторыі Беларусі. Але я думаю, што ён спрабуе захаваць маленькую армію, якая ў яго яшчэ ёсьць. Гэта залежыць ад ціску з боку Крамля. Пры гэтым Лукашэнка кожны дзень робіць разьлікі наконт уласнага выжываньня».
ГЛЯДЗІЦЕ ТАКСАМА: Як Лукашэнка паўтара года ўцягваў Беларусь у вайну. Храналёгія, якая ўсё тлумачыцьВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.