Чэская Рэспубліка адправіла цягніком ва Ўкраіну некалькі дзясяткаў танкаў Т-72 і баявых машын пяхоты.
Гэта дар чэскай арміі, аб якім дамовіліся саюзьнікі ў рамках Паўночнаатлянтычнага альянсу, паведаміў сэрвэр Echo24.
«Зафіксаваныя пастаўкі чэскіх БМП і танкаў Т-72. Я веру, што мы зможам працягнуць гэтыя пастаўкі», — напісаў у Twitter дэпутат Ондржэй Бэнэшык.
Паведамляецца, што ва Ўкраіну накіроўваецца да 40 танкаў Т-72. Гэта тэхніка старэйшага пакаленьня, яна не выкарыстоўвалася чэскай арміяй, а ва ўкраінскай знаходзіцца на ўзбраеньні.
Раней Прага ўжо адправіла ва Ўкраіну зэнітныя самаходныя ўстаноўкі 9К35М «Страла-10» — гэта савецкія сыстэмы, зь якімі ўкраінскія вайскоўцы маюць вопыт абыходжаньня. Чэская армія пачала мадэрнізацыю і некалькі месяцаў таму замяніла іх швэдзкімі RBS 70NG.
ГЛЯДЗІЦЕ ТАКСАМА: Як выглядае пасьля баёў вызвалены Ўзброенымі сіламі Ўкраіны пасёлак Лук’янаўка. ФОТА