Расейскія вайскоўцы, верагодна, вырашылі цалкам сысьці са сваіх пазыцый вакол Харкава ва ўмовах украінскіх контрнаступаў з аднаго боку і абмежаванага падмацаваньня з другога, піша ў сваім матэрыяле амэрыканскі Інстытут дасьледаваньня вайны (ISW).
«Такім чынам, Украіна, падобна, выйграла бітву за Харкаў. Украінскія сілы не дазволілі расейскім войскам акружыць Харкаў, ня кажучы ўжо пра яго захоп, а потым выгналі іх з-пад горада, як яны зрабілі з расейскімі войскамі, якія спрабавалі захапіць Кіеў», — гаворыцца ў дасьледаваньні.
Аналітыкі адзначаюць, што ўкраінскія войскі хутчэй за ўсё паспрабуюць перарэзаць прынамсі адну, самую заходнюю з наземных ліній забесьпячэньня паміж Белгарадам і расейскімі войскамі, засяроджанымі вакол Ізюма. Аднак Расея выкарыстоўвае некалькі такіх ліній, у тым ліку і тыя, што знаходзяцца на выдаленьні ад пазыцый Узброеных сіл Украіны і малаверагодна, што ўкраінскія войскі, якія наступаюць, дабяруцца да іх у бліжэйшы час, піша ISW.
Цяпер асноўныя намаганьні расейскіх войскаў сканцэнтраваныя на захопе Севераданецку і Лісічанску, гавораць заходнія аналітыкі.
Мэр Харкава і ўкраінскі Генштаб кажуць пра адвод войскаў з-пад Харкава
У ранішняй зводцы Генштабу Ўзброеных сіл Украіны 14 траўня таксама гаворыцца пра тое, што Расея адводзіць свае войскі з-пад Харкава:
«На Харкаўскім кірунку войска РФ актыўных баявых дзеяньняў не праводзіла, засяродзіўшы асноўныя намаганьні на забесьпячэньні адводу сваіх войскаў ад Харкава, утрыманьні пазыцый і маршрутаў забесьпячэння».
Інфармацыю пра адвод расейскіх войскаў з-пад Харкава пацьвердзіў ВВС мэр горада Ігар Церахаў. Паводле яго, цяпер расейскія войскі пакідаюць навакольлі горада, рухаючыся ў бок расейска-ўкраінскай мяжы. Ім толькі адзін раз удалося заняць невялікую частку горада, і прабылі яны там нядоўга. Паводле яго, горад не абстрэльваюць ужо пяць дзён.
«Цяпер у Харкаве ціха, і людзі паступова вяртаюцца ў горад. Мы забясьпечваем усіх жыхароў вадой, газам і электрычнасьцю. Аднак, на няшчасьце, многія жылыя будынкі разбураныя або пашкоджаныя», — паведаміў кіраўнік горада.
ГЛЯДЗІЦЕ ТАКСАМА: Расея выводзіць свае войскі з-пад Харкава; трэцяя фаза вайны. 80-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.