Выступаючы на саміце G7 празь відэасувязь, Зяленскі адзначыў, што «мір магчымы проста тады, калі ёсьць мір не з адным суседам, а калі ён з усімі суседзямі. Я хачу зьвярнуць увагу на адну краіну. Тэрыторыя Беларусі ўжо выкарыстоўваецца для ўдараў па Ўкраіне. Цяпер мы бачым вялікую пагрозу. Расея спрабуе наўпрост уцягнуць Беларусь у вайну, разыгрываючы правакацыю з тым, што мы нібыта рыхтуем удар па гэтай краіне».
Зяленскі таксама заўважыў, што Ўкраіна ніколі ня мела на мэце нападу на Беларусь.
«Каб цалкам зьняць гэтую правакацыю, зьняць гэтыя наратывы, якія гучаць ад Лукашэнкі, мы прапануем сваё рашэньне: на мяжы Ўкраіны і Беларусі можа быць разьмешчаная місія міжнародных назіральнікаў для маніторынгу сытуацыі ў справе бясьпекі, — сказаў Зяленскі. — Фармат можа быць распрацаваны нашымі дыпляматамі. Я вас прашу на ўзроўні G7 падтрымаць гэтую ініцыятыву».
- Аляксандар Лукашэнка паведаміў, што ў Санкт-Пецярбургу пасьля нефармальнага саміту СНД у яго адбылася сустрэча сам-насам з прэзыдэнтам Расеі Ўладзімірам Пуціным, і заявіў пра разгортваньне супольнай з Расеяй групоўкі войскаў. Таксама ён сказаў, што ў Беларусь прыбудуць тысячы расейскіх салдатаў.
- Увечары 8 кастрычніка амбасадара Ўкраіны ў Менску Ігара Кізіма запрасілі ў МЗС Беларусі, каб уручыць яму дыпляматычную ноту. У ноце беларускі бок сьцьвярджае, што Ўкраіна плянуе напад на тэрыторыю Беларусі. Украінскае МЗС заявіла, што інфармацыя не адпавядае рэчаіснасьці, і назвала дзеяньні Менску «чарговымі інсынуацыямі рэжыму».