Урад Беларусі зацьвердзіў новую сыстэму рэгуляваньня цэнаў, у ёй 370 таварных пазыцый і яшчэ больш кантролю

Савет міністраў Беларусі вызначыў новую сыстэму рэгуляваньня цэн, паведамляе прэс-служба ўраду.

У адпаведнасьці з ёй уводзіцца рэгуляваньне цэн на тавары ўсяго спажывецкага кошыка — як беларускай вытворчасьці, так і імпартныя.

Згодна з дакумэнтам, праз вызначэньне розных гранічных надбавак цэны рэгулююцца на 370 таварных пазыцый, якія ўключаюць прадукты харчаваньня, тканіны і пражу, адзеньне, абутак, мэблю, дываны і дывановыя вырабы, тэкстыльныя вырабы, посуд і сталовыя прыборы, электратавары, тэлерадыятавары, будматэрыялы, тавары галянтарэі, аўтамабілі і запчасткі, ровары і матацыклы, друкаваныя выданьні, гадзіньнікі наручныя, мыйныя сродкі і бытавую хімію, гаспадарчыя тавары, ювэлірныя вырабы, іншыя культурна-бытавыя тавары, тавары для спорту і турызму, пісьмовыя тавары, канцылярскія прыналежнасьці, парфумэрыю, гігіены, паперу і іншыя тавары.

Большасьць палажэньняў дакумэнта набыла моц з дня яго прыняцьця, гэта значыць з 19 кастрычніка.

• Для вытворцаў увядуць узгадненьне павышэньня адпускных цэн з дзяржорганамі, аблвыканкамамі і Менскім гарвыканкамам.
• Для імпартэраў і гандлю вызначаюць гранічныя максымальныя надбаўкі, незалежна ад колькасьці пасярэднікаў, якія ўдзельнічаюць.
• Пры гэтым цэны на рэшткі спажывецкіх тавараў павінны быць прыведзеныя ў адпаведнасьць з патрабаваньнямі новай пастановы на працягу пяці працоўных дзён.
• Таксама ўводзіцца абмежаваньне бартэрных пагадненьняў. Цяпер такія апэрацыі таксама мусяць узгадняцца зь дзяржаўнымі органамі.
• Прадугледжана забарона на выплату бонусаў і іншых узнагароджаньняў за прасоўваньне тавараў у гандлі пры пастаўцы вытворцамі айчыннай прадукцыі.
• Дзяржаўныя органы надзялілі дадатковымі паўнамоцтвамі кантролю за выкананьнем заканадаўства аб цэнах і цэнаўтварэньні.

6 кастрычніка Аляксандар Лукашэнка па выніках нарады аб цэнавай сытуацыі ў краіне падпісаў дырэктыву нумар 10 «Аб недапушчальнасьці росту цэн». Свае дакумэнты прынялі ўрад, Камітэт дзяржкантролю, Генпракуратура. Тыя, хто павысіць цэны бяз санкцыі міністра антыманапольнага рэгуляваньня і гандлю або старшыні аблвыканкаму (Менгарвыканкаму), будуць несьці адказнасьць аж да крымінальнай, заявіў на нарадзе Лукашэнка.

10 кастрычніка ён скарэктаваў сваю пазыцыю: «Галоўнае не забарона на рост цэнаў. Не забарона. Чытайце дырэктыву. Галоўнае — гэта выпрацоўка сыстэмы кантролю за цэнаўтварэньнем. А да выпрацоўкі гэтай сыстэмы (гэта ўсяго толькі некалькі дзён), так, цэны расьці не павінны».

За павышэньне цэнаў ўжо заведзена некалькі крымінальных спраў.