Пра гэта ён напісаў па-польску ў Твітэры.
Czesi bardzo dobrze wiedzą, co znaczy polskie hasło Za naszą i waszą wolność. Jesteśmy nie tylko sąsiadami, lecz również strategicznymi partnerami i Czesi zawsze będą gotowi bronić Polaków.
— Jan Lipavský (@JanLipavsky) January 23, 2023
Ліпаўскі выступіў з запэўніваньнямі пасьля таго, як адзін з кандыдатаў у прэзыдэнты Чэхіі — мільярдэр і былы прэм’ер-міністар Андрэй Бабіш — увечары ў нядзелю на тэледэбатах заявіў, што калі б стаў прэзыдэнтам, не адправіў бы чэскіх вайскоўцаў на дапамогу Польшчы або краінам Балтыі ў выпадку нападу на іх.
«Адназначна не. Я хачу міру і не хачу вайны. Я б ні ў якім разе не паслаў нашых дзяцей і дзяцей нашых жанчын на вайну», — сказаў Бабіш. Вядоўца некалькі разоў паўтараў пытаньне, і кожны раз Бабіш адказваў на яго адмоўна, сьцьвярджаючы пры гэтым, што яго супернік у другім туры выбараў, адстаўны генэрал Пэтр Павэл, хоча ўцягнуць Чэхію ў вайну.
Хто менавіта мог бы напасьці на Польшчу ці краіны Балтыі, вядоўца дэбатаў не сказаў, аднак з кантэксту было відавочна, што на ўвазе мелася Расея.
Чэхія, як і Польшча, Эстонія, Літва і Латвія, — сябра NATO. Артыкул 5 Паўночнаатлянтычнай дамовы прадугледжвае, што напад на аднаго з саюзьнікаў павінен разглядацца як напад на ўвесь саюз. На гэта Бабішу ўказалі яго палітычныя апанэнты, у тым ліку і Ліпаўскі. Партыі, якія ўваходзяць у кіруючую кааліцыю ў Чэхіі, падтрымліваюць Паўла, яны ж актыўна выступаюць у падтрымку Ўкраіны.
V duelu @CzechTV jsem vůbec nechtěl odpovídat na hypotetickou otázku o napadení Polska nebo Pobaltí. Jsem přesvědčený, že se to nestane, a nechci to vůbec připouštět. Je zodpovědností světových politiků, aby válce zabránili.
— Andrej Babiš (@AndrejBabis) January 22, 2023
Бабіш мусіў апраўдвацца. Адразу ж пасьля дэбатаў ён напісаў у Твітэры, што ня верыць у магчымасьць нападу на Польшчу ці краіны Балтыі, а калі б на іх усё ж напалі, то ён як прэзыдэнт усё ж прыйшоў бы ім на дапамогу.
Паколькі крытыка не аціхла, у панядзелак Бабіш напісаў, што ня ставіў пад сумнеў абавязкі Чэхіі, а толькі выступае супраць Трэцяй сусьветнай вайны. Паводле яго слоў, ён ужо патлумачыў сваю пазыцыю прэмʼеру Польшчы Матэвушу Маравецкаму, а прэзыдэнта Чэхіі Мілаша Зэмана папрасіў патлумачыць пазыцыю кандыдата ў прэзыдэнты польскаму прэзыдэнту Анджэю Дуду. Афіцыйная Варшава пакуль ніяк не камэнтавала выказваньні Бабіша. Іх, аднак, скрытыкавала польская прэса.
Пэтр Павэл — таксама па-польску — напісаў у Твітары, што другі свой візыт у якасьці прэзыдэнта зробіць у Польшчу (першы візыт чэскія прэзыдэнты традыцыйна робяць у Славаччыну), і асудзіў выказваньні свайго суперніка.
Zdecydowałem, że jeśli zostanę prezydentem w moją drugą podróż udam się z wizytą do Polski, aby zapewnić naszego dobrego sąsiada i przyjaciół z krajów bałtyckich, że dotrzymujemy umów i że Andrej Babiš nie przemawia w naszym imieniu.
— Petr Pavel (@general_pavel) January 23, 2023
Другі тур выбараў прэзыдэнта Чэхіі адбудзецца 27 і 28 студзеня. У першым туры яны набралі амаль аднолькавую колькасьць галасоў. Апытаньні сьведчаць, што шанцы Паўла вышэйшыя. Бабіш перад другім турам зрабіў стаўку на тое, каб пераканаць выбарцаў, што Павэл як вайсковец хоча ўцягнуць Чэхію наўпрост у канфлікт з Расеяй. Павэл адмаўляе, што пад ягоным кіраўніцтвам Чэхія будзе імкнуцца да вайны з Расеяй.
ГЛЯДЗІЦЕ ТАКСАМА: У першым туры прэзыдэнцкіх выбараў у Чэхіі перамог экс-кіраўнік Ваеннага камітэту NATO, генэрал у адстаўцы Пэтр Павел