Дзярждума Расеі падчас вайны прыняла законапраект аб электронных позвах у ваенкаматы. Што гэта зьменіць?

Дзярждума Расеі амаль аднагалосна (адзін дэпутат устрымаўся) прыняла законапраект аб электронных позвах у ваенкаматы.

Закон уступае ў сілу з дня публікаваньня. Перад тым ён павінен прайсьці слуханьні ў Савеце фэдэрацыі і трапіць на подпіс да прэзыдэнта. Гэта можа адбыцца за некалькі дзён. Закон зможа прымяняцца ўжо пры вясновым прызыве.

Прыняцьце закона аўтаматызуе рассылку пазоваў для ўсіх ваеннаабавязаных расейцаў – мужчын ад 18 да 60 гадоў, а таксама жанчын з пэўнымі ваенна-уліковымі спэцыяльнасцямі, напрыклад, мэдыкаў. Пазоў будзе лічыцца ўручаным на працягу сямі дзён з моманту яго выпіскі.

На грамадзян, якім «уручаная» позва, адразу ж накладаецца «забясьпечальная мера» – забарона на выезд з краіны. Калі расеец ухіляецца ад паходу ў ваенкамат, то яго правы абмяжоўваюцца яшчэ больш – яму забаронена атрымліваць крэдыты, а таксама распараджацца сваёй рухомай і нерухомай маёмасьцю.

Такім чынам у Расеі хочуць забараніць выезд за мяжу тым, хто атрымаў позву і не зьявіўся ў камісарыят. Такія папраўкі ў законы апублікавалі 11 красавіка ў базе заканадаўчай дзейнасьці Дзярждумы Расеі:

«Грамадзянам, якія падлягаюць прызыву на вайсковую службу і атрымалі позву вайсковага камісарыяту, з дня, калі ў адпаведнасьці з фэдэральным законам такая позва лічыцца ўручанай, забараняецца выезд з Расейскай Федэрацыі. Указанае абмежаваньне дзейнічае да выкананьня абавязку зьявіцца па позве ў вайсковы камісарыят», — гаворыцца ў законапраекце.

У Крамлі сцьвярджаюць, што папраўкі «ніяк не зьвязаныя з плянамі на мабілізацыю» і «ня выклічуць новай хвалі эміграцыі».

«Гэта зьвязана з вайсковым улікам. І гэта трэба разумець і тлумачыць», — сказаў прэс-сакратар прэзыдэнта Расеі Дзьмітрый Пяскоў.

Раней стала вядома, што позва аб прызыве будзе лічыцца атрыманай з моманту размяшчэньня яе электроннай копіі ў «асабістым кабінэце» на Дзяржпаслугах Расеі. Новаўвядзеньні ня будуць распаўсюджвацца на вясновы прызыў у Расеі, які працягваецца да 15 ліпеня. Аб гэтым заявіў кіраўнік камітэта Дзярждумы па абароне Андрэй Картапалаў, камэнтуючы новыя папраўкі.

Першая хваля мабілізацыя ў Расеі на вайну з Украінай, абвешчаная ў верасьні 2022 году, выклікала вялікую хвалю эміграцыі сярод маладых расейцаў прызыўнога веку, гаворка ідзе аб сотнях тысяч чалавек, якія пакінулі Расею, каб ня трапіць на вайну.