Палітыка

Ізраільскае войска ў сэктары Газа вызваліла закладніцу

Оры Мегідыш (у цэнтры), ізраільская вайскоўка, якая была ў закладніцах у ХАМАС, пасьля вызваленьня сустрэлася з роднымі

Армія абароны Ізраіля (ЦАХАЛ) заявіла, што падчас наземнай апэрацыі ў сэктары Газа ўдалося вызваліць ізраільскую вайскоўку, захопленую 7 кастрычніка ў закладніцы радыкальнай палестынскай групоўкай ХАМАС.

Гаворка ідзе пра першы выпадак вызваленьня закладніцы ў баі і пра першую вызваленую вайскоўку з ліку закладнікаў. Раней ХАМАС вызваліў чатырох цывільных закладніц.

Як паведаміў ЦАХАЛ, вызваленая Оры Мегідыш адчувае сябе добра і ўжо сустрэлася са сваёй сям’ёй. У заяве падкрэсьліваецца, што робіцца ўсё для вызваленьня астатніх закладнікаў; іх звыш 230, большасьць — цывільныя асобы.

ГЛЯДЗІЦЕ ТАКСАМА: Прэзыдэнт Ірану заявіў, што Ізраіль «перайшоў чырвоныя лініі». Баявыя апэрацыі ЦАХАЛ у Газе пашыраюцца

Прэмʼер-міністар Ізраілю Біньямін Нэтаньягу пацьвердзіў вызваленьне закладніцы. Ён заявіў, што Ізраіль ня пойдзе на спыненьне агню і будзе змагацца супраць ХАМАС да таго часу, пакуль ня зьнішчыць гэтую арганізацыю.

Сёньня ж ХАМАС апублікаваў відэа з трыма закладніцамі, на якім яны заклікаюць ізраільскія ўлады пайсьці на вызваленьне палестынскіх зьняволеных у абмен на закладнікаў. Калі і дзе яно было зьнятае, незразумела. Ізраільскія ўлады назвалі публікацыю відэа «жорсткай прапагандай».

Падчас нападаў ХАМАС на Ізраіль 7 кастрычніка былі забітыя каля 1400 чалавек. Закладнікі, галоўным чынам жыхары населеных пунктаў ля мяжы з Газай, былі адвезены ў сэктар і ўтрымліваюцца там у невядомых месцах. Ізраіль у адказ на напад наносіць па сэктары Газа авіяўдары, а некалькі дзён таму пачаў наземную апэрацыю, якая пакуль, паводле ацэнак, носіць абмежаваны характар.

Вайна Ізраілю з ХАМАСам. Асноўнае

  • 7 кастрычніка Ізраіль зазнаў ракетнага ўдару з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
  • Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
  • Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
  • ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
  • Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
  • Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
  • 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
  • Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
  • Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
  • Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
  • Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
  • 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
  • За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
  • 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
  • Разбуральная вайна Ізраілю ў cэктары Газа ў лічбах.

  • «Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.

  • «Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША.

  • Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
  • 23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
  • 27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
  • 3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.