Паведамляецца, што ў часе сустрэчы «абмеркавалі пытаньні разьвіцьця міжпарляменцкага супрацоўніцтва і сацыяльна-эканамічнага ўзаемадзеяньня Расеі, Беларусі, Абхазіі і Паўднёвай Асэтыі». Пра гэта паведаміў 17 снежня сайт Дзярждумы Расеі.
Аналягічныя фармулёўкі выкарыстоўвала і прэс-служба Палаты прадстаўнікоў. Андрэйчанка 18 сьнежня возьме ўдзел у пасяджэньні Парлямэнцкага сходу так званай «саюзнай дзяржавы» Беларусі і Расеі ў Маскве.
Абхазія і Паўднёвая Асэтыя — самаабвешчаныя дзяржавы на сувэрэннай тэрыторыі Грузіі, не прызнаныя міжнароднай супольнасьцю. На сёньняшні дзень са 193 дзяржаў – чальцоў ААН незалежнасьць рэспублік прызналі 5 краін — Расея, Нікарагуа, Вэнэсуэла, Науру і Сырыя. Пасьля ўзброенага канфлікту 2008 году, у якім Абхазію і Паўднёвую Асэтыю актыўна падтрымала Расея, Тбілісі дэ-факта страціў кантроль над гэтымі тэрыторыямі. Юрыдычна Беларусь не прызнала незалежнасьць гэтых суб’ектаў.
28 верасьня 2022 года Аляксандар Лукашэнка пасьля працяглага знаходжаньня ў Сочы і перамоваў з прэзыдэнтам Расеі Ўладзімірам Пуціным раптам наведаў Піцунду і сустрэўся з кіраўніком Абхазіі Асланам Бжаніяй. Прэзыдэнтка Грузіі Саломэ Зурабішвілі і МЗС краіны асудзілі гэты крок.
21 лютага 2023 году Лукашэнка прыняў Бжанію ў Менску. Кіраўнік грузінскай дзяржавы і замежнапалітычнае ведамства зноў раскрытыкавалі беларускія ўлады за такія кантакты ў абход Тбілісі. Праз тыдзень пасьля той сустрэчы стала вядома, што Абхазія плянуе пастаўляць у Беларусь віны і іншыя тавары, а ўзамен хоча атрымліваць малочную прадукцыю.
У ліпені гэтага года тэма магчымага прызнаньня Беларусьсю незалежнасьці самаабвешчанай рэспублікі Паўднёвая Асэтыя была абмеркаваная на пасяджэньні мясцовага парлямэнту.
ГЛЯДЗІЦЕ ТАКСАМА: Армэнія заявіла пратэст Расеі за абразьлівыя выказваньні ў эфіры дзяржаўнага тэлеканалу ў адрас Пашыньяна ГЛЯДЗІЦЕ ТАКСАМА: Расейскія вайскоўцы сьмяротна паранілі грамадзяніна Грузіі пры спробе затрыманьня