«Узброеныя сілы Беларусі і Кубы ўзаемна зацікаўленыя ў разьвіцьці кантактаў у галіне вайсковай авіяцыі і супрацьпаветранай абароны», — пра гэта па выніках сустрэчы ў Менску камандуючага ВПС і сіламі СПА Беларусі Андрэя Лук’яновіча з кубінскім калегам Марыё Эрнэста Радрыгесам Пэньярандам паведаміла беларускае Мінабароны.
«Адбыўся грунтоўны абмен думкамі па пытаньнях далейшага ўзаемадзеяньня. Бакі пацьвердзілі ўзаемную зацікаўленасьць у разьвіцьці кантактаў па лініі ВПС і СПА», — гаворыцца ў паведамленьні.
У канцы студзеня падчас візыту на Кубу міністар абароны Беларусі Віктар Хрэнін заявіў, што Гавана для Менску — стратэгічны саюзьнік у Заходнім паўшарʼі. Ён зазначыў, што паміж Беларусьсю і Кубай ідзе канструктыўны дыялёг.
На пачатку студзеня Аляксандар Лукашэнка заявіў, што разьлічвае на вынікі актывізацыі сувязяў Менску і Гаваны. Раней Лукашэнка зазначаў, што ўзровень эканамічнага супрацоўніцтва Беларусі і Кубы адстае ад палітычнага і гуманітарнага.
ГЛЯДЗІЦЕ ТАКСАМА: Міністар абароны Беларусі наведаў Гавану і назваў Кубу «стратэгічным хаўрусьнікам у Заходнім паўшар’і» ГЛЯДЗІЦЕ ТАКСАМА: Хрэніна ўзнагародзілі кубінскім ордэнам за «барацьбу з імпэрыялізмам»