Славацкія СМІ паведамляюць, што ў прэм'ер-міністра краіны Робэрта Фіца стралялі на сустрэчы зь людзьмі ў горадзе Гандлава, прыкладна за 150 кілямэтраў на поўнач ад сталіцы краіны, Браціславы.
Яго адвезьлі верталётам у шпіталь у суседнім горадзе Банска Быстрыца, меркаванага нападніка затрымалі.
На старонцы Фіца ў фэйсбуку зьявілася паведамленьне, дзе гаворыцца, што раненьні пагражаюць жыцьцю прэм'ера. Увечары міністар абароны Робэрт Каліняк сказаў, што хірургі працягваюць апэраваць прэм'ера і што той «змагаецца за жыцьцё». Позна ўвечары віцэ-прэм'ер Томаш Тараба паведаміў журналістам, што апэрацыя прайшла пасьпяхова і чакаецца, што Фіца выжыве.
На ранейшым брыфінгу міністар унутраных справаў Матуш Шутай Эштак паведаміў, што ў краіне ўзмоцненая ахова палітыкаў і журналістаў, і заклікаў спыніць праявы нянавісьці ў сацыяльных сетках і мэдыях. Ён таксама заявіў, што замах на прэм'ер-міністра быў палітычна матываваны, нападнік выпусьціў у Фіца пяць куляў.
Урад і парлямэнт Славаччыны зьбяруцца на экстранае пасяджэньне, падчас якога вызначаць кандыдатуру часовага выканаўцы абавязкаў прэм'ер-міністра краіны, паведамляе dennikn.sk.
Autentické video po streľbe na Roberta Fica. Zdroj videa nepoznáme, šíri sa sociálnymi sieťami. Autenticitu videa však môžeme potvrdiť, na mieste činu sa nachádza aj náš reportér Daniel Vražda.Čítajte viac: https://t.co/UO4vVUO13A pic.twitter.com/GfnuVk7GsV
— Denník N (@dennikN) May 15, 2024
Славацкае агенцтва Aktuality.sk пагутарыла з сынам падазраванага ў нападзе, 71-гадовага Ю.Ц. Той сказаў журналістам, што бацька меў афіцыйна зарэгістраваную зброю, бо некалі працаваў у прыватнай ахоўнай службе. Міністэрства ўнутраных справаў пакуль афіцыйна не пацьвердзіла гэтай інфармацыі.
У сацыяльных сетках зьявілася відэа, дзе меркаваны нападнік адказвае на пытаньне пра свае матывы. Ён кажа, што не згодны з апошнімі крокамі ўраду, у прыватнасьці ў адносінах да СМІ. Відавочна, што відэа зьнята ўжо пасьля яго затрыманьня, аднак цалкам абставіны, пры якіх яно зьявілася, не ясныя.
Як перадаюць, нападнік страляў у Фіца каля Дому культуры, дзе адбывалася паседжаньне ўраду. Прэм'ер-міністар выйшаў павітацца зь людзьмі.
Зьявілася рэакцыя прэзыдэнткі краіны Зузаны Чапутавай: «Я шакаваная. Я зычу Робэрту Фіцу ў гэты крытычны час шмат сілаў, каб ён змог ачуняць ад гэтага нападу».
Замах на Фіцу асудзілі і іншыя славацкія палітыкі, у тым ліку абраны прэзыдэнт Пэтэр Пэлегрыні, а таксама шэраг эўрапейскіх палітыкаў і чыноўнікаў, сярод якіх кіраўніца Эўракамісіі Урзуля фон дэр Ляен, генэральны сакратар NATO Енс Столтэнбэрг, канцлер Нямеччыны Оляф Шольц.
У сваю чаргу некаторыя саюзьнікі Фіцы па ягонай партыі і кіроўнай кааліцыі рэзка крытыкуюць апазыцыю і журналістаў, фактычна ўскладаючы на іх ускосную адказнасьць за замах. Лідэр Нацыянальнай партыі, якая ўваходзіць ва ўрадавую кааліцыю, Андрэй Данка заявіў, што для яго партыі зараз «пачынаецца палітычная вайна», і параіў супернікам ураду «сядзець ціха».
Фіца быў прызначаны кіраўніком ураду ў кастрычніку, пасьля перамогі яго папулісцкай партыі «Курс – Славацкая сацыял-дэмакратыя» на парлямэнцкіх выбарах. Партыя прытрымліваецца эўраскептычнай і нацыяналістычнай арыентацыі і перад выбарамі выступала за абмежаваньне ваеннай дапамогі Ўкраіне і за рэзкае ўзмацненьне міграцыйнага кантролю.