Ордэн за вернасьць Расеі. Якія вынікі чарговага візыту Лукашэнкі ў Маскву

Восьмая з пачатку 2024 году сустрэча Аляксандра Лукашэнкі і Ўладзіміра Пуціна мела своеасаблівы кантэкст. З аднаго боку, ёй спадарожнічала ўрачыстасьць. Расейскі лідэр уручыў Лукашэнку найвышэйшую дзяржаўную ўзнагароду Расеі — ордэн Святога апостала Андрэя Першазваннага.

Такім ордэнам у свой час у ХІХ стагодзьдзі быў узнагароджаны віленскі генэрал-губэрнатар Міхаіл Мураўёў, вядомы ў беларускай гісторыі як «Вешальнік»: ён жорстка задушыў вызвольнае паўстаньне 1863 году. Ордэн за задушэньне паўстаньня — паралель у выпадку з Лукашэнкам вельмі сымбалічная.

Напярэдадні, на саміце Садружнасьці незалежных дзяржаў, прымеркаваным да дня народзінаў Пуціна, Лукашэнка ўсяляк дэманстраваў настальгію па СССР, заўзята заклікаў умацоўваць ролю і геапалітычную вагу СНД — структуры, якая даўно ператварылася проста ў клюб кіраўнікоў постсавецкіх краін, якіх яднае высокая ступень ляяльнасьці Расеі. Якая можа быць геапалітычная вага клюбу, пытаньне асобнае. Але спробу, намаганьне ў Маскве яўна заўважылі.

З другога боку, з моманту апошняй сустрэчы Лукашэнкі і Пуціна ў Валааме, якая адбылася сёлета ў ліпені, у адносінах паміж хаўрусьнікамі назьбіраліся праблемы, якія чакаюць калі не вырашэньня, то абмеркаваньня. Гэта і тэма расейскіх «Шахэдаў», якія рэгулярна залятаюць на тэрыторыю Беларусі і іх даводзіцца зьбіваць, і пэўныя малазразумелыя сыгналы, якія падае афіцыйны Менск Захаду, вызваляючы невялікую колькасьць палітвязьняў, і пэрспэктывы прэзыдэнцкіх выбараў у Беларусі, якія Лукашэнка хацеў бы правесьці пры падтрымцы ці хаця б маўклівай ляяльнасьці з боку Масквы.

Амбасадар Беларусі ў Расеі Аляксандар Рагожнік паведамляў, што цяпер прапрацоўваецца дадатковы пул сумесных праектаў, якія павінна фінасаваць РФ. Аднак, гледзячы па ўсім, паўнафарматных перамоваў не атрымалася.

Лукашэнка і Пуцін сустракаліся сам на сам 15 хвілінаў перад цырымоніяй узнагароджаньня і нейкі час пасьля цырымоніі, уся астатняя камунікацыю адбывалася ў прысутнасьці дэлегацый у складзе 3-4 чыноўнікаў.

У пачатку сустрэчы Лукашэнка выказаў пажаданьне абмеркаваць 2-3 пытаньні. Невядома, ці удалося гэта, бо перамовы былі кароткія. На тле таго, што апошняя сустрэча ў Валааме цягнулася амаль трое сутак, то сёньняшні перамоўны раунд выглядаў як захаваньне нейкага рытуалу. У сухой рэшце — толькі расейскі ордэн, на якім выгравіраваныя словы: «За веру і вернасьць».