Дэпутат нямецкага Бундэстага Мануэль Сарацын узяў «шэфства» над палітвязьнем Мікалаем Дзядком. Ён заклікаў «неадкладна і безумоўна» вызваліць Мікалая Дзядка.
«Я вельмі занепакоены неабгрунтаваным прымяненьнем артыкула 411 Крымінальнага кодэксу Рэспублікі Беларусь. Гэты артыкул — „злоснае непадпарадкаваньне адміністрацыі папраўчай установы“ — выкарыстоўваецца, як і ў справе Мікалая Дзядка, дзеля легалізацыі жорсткага і зьневажальнага абыходжаньня з палітычнымі зьняволенымі ў беларускіх турмах», — цытуе нямецкага дэпутата сайт праваабарончай арганізацыі Libereco.
Кампанія ў падтрымку палітзьняволеных у Беларусі ініцыяваная швайцарска-нямецкай праваабарончай арганізацыяй Libereco — Партнэрства па правах чалавека для падтрымкі зьняволеных і іх сем’яў.
Мікалай Дзядок адбывае пакараньне ў папраўчай калёніі № 9 у Горках (Магілёўская вобласьць).
27 траўня 2011 году актывіста беларускага руху анархістаў Мікалая Дзядка асудзілі на чатыры з паловай гады пазбаўленьня волі ў калёніі агульнага рэжыму. У лютым 2015 году суд працягнуў яго зьняволеньне яшчэ на адзін год па новай крымінальнай справе — «злоснае непадпарадкаваньне патрабаваньням адміністрацыі папраўчай установы».
Дзядка трымалі ў адзіночнай камэры, ня раз у невыносных умовах.
У траўні гэтага году дэпутатка нямецкага Бундэстагу Марылюіза Бэк запатрабавала неадкладна вызваліць палітвязьня Ігара Аліневіча, які адбывае пакараньне ў калёніі «Віцьба-3». Яна ўзяла шэфства над Ігарам Аліневічам у межах кампаніі, распачатай Libereco дзеля палітзьняволеных у Беларусі.