“Чакаецца, што будзе прынята рашэньне завершыць фінальны агляд і выдзеліць апошні транш крэдыту”, — паведаміла сталая прадстаўніца МВФ у Беларусі Натальля Калядзіна.
“Чакаецца, што рашэньне Рады дырэктараў будзе станоўчым”, дадала яна.
3—16 лютага місія МВФ дасягнула пагадненьня з уладамі Беларусі аб завяршэньні фінальнага, чацьвёртага, агляду праграмы stand-by. МВФ пацьвердзіў, што ўлады Беларусі паводле стану на канец сьнежня выканалі ўсе заплянаваныя крытэры праграмы і правялі належныя структурныя пераўтварэньні.
Разьлічаная на 15 месяцаў дамоўленасьць зь беларускім урадам была зацьверджаная Выканаўчай радай МВФ у студзені 2009 году. У чэрвені аб’ём фінансавай падтрымкі быў даведзены да 3,5 мільярда.
Першую частку крэдыту ў памеры 800 мільёнаў даляраў Беларусь атрымала год таму, другі транш (блізу 700 мільёнаў даляраў) паступіў у ліпені 2009-га.
Да канца мінулага году Беларусь яшчэ двойчы атрымлівала сродкі — адпаведна ў памеры 700 мільёнаў і 688 мільёнаў.
Агульная сума грошай, атрыманых ад МВФ, наблізілася да 2 мільярдаў 900 мільёнаў даляраў.
