«Нават калі з прычыны сваіх працоўных абавязкаў я знаходжуся далёка, маё сэрца заўсёды ў Армэніі», — напісаў на сваёй старонцы ў Facebook сусьветна вядомы францускі шансанье армянскага паходжаньня Шарль Азнавур.
«Я вельмі занепакоены і заклапочаны сытуацыяй, якая склалася ў Армэніі. Я прапаную ўсім бакам сабрацца за сталом перамоваў, каб знайсьці нейкае рашэньне і пазьбегнуць якога-небудзь гвалту. Кожны павінен пайсьці на саступкі, каб захаваць адзінства нацыі, застаючыся верным гэтак важным для нас гуманістычным і дэмакратычным каштоўнасьцям», — гаворыцца ў заяве Азнавура.
«Маё самае вялікае жаданьне палягае ў тым, каб армянская моладзь знайшла сваё месца і адбылася ў разьвітай і мірнай Армэніі», — напісаў Шарль Азнавур.
Нягледзячы на затрыманьні сотняў пратэстоўцаў у Ерэване, прыхільнікі апазыцыйнага руху, які ўзначальвае дэпутат Нікол Пашыньян, зноў выйшлі на вуліцы Ерэвана ў суботу, каб працягнуць акцыі мірнага грамадзянскага непадпарадкаваньня. Яны патрабуюць адстаўкі новапрызначанага прэм’ер-міністра Армэніі, былога прэзыдэнта Сэржа Саргсьяна.
