МЕНСК. На плошчы працягваецца спантанны мітынг
18.50 З боку факультэтаў БДУ па вуліцы Бабруйскай нейкі час была спэцтэхніка АМАПу і аўтазакі, яна пастаяла і зьехала. Цяпер вуліцах Савецкай, Бабруйскай Ленінградзкай няма ніякай спэцтэхнікі, перадае карэспандэнт Свабоды з Плошчы.
Людзі прыбываюць, але частка сыходзіць. На плошчы працягваецца спантанны мітынг. Пратэстоўцаў ніхто не разганяе, частка людзей селі на зямлю, каб «не дапусьціць правакатараў». Вайскоўцы, якія стаяць у ачапленьні каля Дому ўраду, абяцаюць, што «калі пратэст будзе мірным, гвалт ужывацца ня будзе».
19.15 Да пратэстоўцоў далучыліся супрацоўнікі «Беларускай чыгункі», яны прыйшлі арганізаванай калёнай з Інстытуту культуры. Цяпер, па словах супрацоўнікаў «Беларускай чыгункі», на плошчы Незалежнасьці прысутнічае каля 150 супрацоўнікаў прадпрыемства.
«Мы адмаўляемся ад званьняў». Сто ляўрэатаў стыпэндыі Лукашэнкі адмовіліся ад яе
Сто стыпэндыятаў, ляўрэатаў, прэміянтаў і дыплямантаў Спэцыяльнага фонду прэзыдэнта Беларусі па падтрымцы таленавітай моладзі і адораных студэнтаў і навучэнцаў адмовіліся ад званьня і ўсіх прывілеяў, піша Tut.by.
У адкрытай заяве гаворыцца, што «немагчыма насіць званьне ляўрэата стыпэндыі прэзыдэнта, калі прэзыдэнт дапускае ў краіне падман і зьверскае зьбіцьцё сваіх жа суграмадзян».
Падпісанты звароту патрабуюць адстаўкі Лукашэнкі, вызваліць палітвязьняў і затрыманых падчас прэзыдэнцкай кампаніі і мірных акцый пратэсту, спыніць гвалту з боку міліцыі, АМАПу і арміі, спыніць перасьлед журналістаў незалежных СМІ і скажэньне інфармацыі ў дзяржаўных СМІ, а таксама правесьці новыя, сумленныя выбары.
Белтэлекам папярэдзіў аб праблемах з інтэрнэтам уначы да канца жніўня
З 17 па 31 жніўня ўначы інтэрнэт будзе працаваць зь перарывамі, паведамляе Белтэлекам.
У Горадні зьбіраюць подпісы за вызваленьне палітвязьняў і новыя выбары
19.05 У Горадні на плошчы Леніна, дзе сабраліся пратэстоўцы, ідзе збор подпісаў пад пэтыцыяй аб вызваленьні вязьняў і прызнаньні выбараў несапраўднымі.
На плошчы Леніна расьцягнулі бел-чырвона-белы сьцяг даўжынёй у некалькі дзясяткаў мэтраў.
Людзі пачалі разыходзіцца. Дамовіліся сустрэцца на гэтым жа месцы ў суботу 15 жніўня а 14:00.
Прэзыдэнт Літвы: мы прыпынілі праліцьцё крыві ў Беларусі
Прэзыдэнт Літвы Гітанас Наўседа заявіў, што прапанаваны ім плян урэгуляваньня сытуацыі ў Беларусі дапамог прыпыніць праліцьцё крыві ў гэтай краіне, паведамляе партал DELFI.
«Мы крыху прыпынілі праліцьцё крыві, я спадзяюся, што гэта неўзабаве будзе цалкам спынена», — сказаў Наўседа журналістам пасьля сустрэчы з прэзыдэнткай Эстоніі Кэрсьці Кальюлайд. Далей чытайце па спасылцы.
ВАЎКАВЫСК. Старшыня гарвыканкаму выйшаў да людзей
Лукашэнка заклікаў беларусаў «супакоіцца і даць навесьці парадак»
Аляксандар Лукашэнка правёў нараду з чальцамі Савету Бясьпекі Беларусі, на якой абмеркаваў цяперашнюю сытуацыю ў краіне, паведамляе БЕЛТА.
«Чарговы раз мы з вамі вяртаемся да пытаньняў становішча нават не ў Беларусі, а ў сталіцы — у Менску. Не скажу, што катастрофа нейкая або ўжо занадта перенапружаная сытуацыя, але праблемаў хапае і пытаньняў хапае, якія неабходна вырашаць.
Мы сёньня ўжо абсалютна выразна бачым, што адбываецца. Бачым сёньня дзейных асобаў. Як мы і гаварылі, завадатарамі гэтага ўсяго і арганізатарамі зьяўляюцца людзі з замежжа. У першых шэрагах ідуць людзі з крымінальным мінулым, прытым прыстойным крымінальным мінулым. Ну, і нашы — дзе дзеці, дзе не зусім ужо дзеці», — сказаў Лукашэнка.
«Не высоўвайцеся вы цяпер на вуліцы! Зразумейце, што вас і нашых дзяцей выкарыстоўваюць як гарматнае мяса! Сёньня ўжо панаехалі сюды з Польшчы, Галяндыі, Украіны, з гэтай „Адкрытай Расеі“, Навальнага і гэтак далей і да таго падобнае. Ужо агрэсія пачалася супраць краіны», — сказаў ён. Цалкам чытайце па спасылцы.
СК завёў крымінальныя справы за «ўдзел у масавых беспарадках» у Берасьці і Пінску
Сьледчы камітэт Беларусі 14 жніўня паведаміў, што завёў крымінальныя справы за ўдзел у масавых беспарадках у Берасьці і Пінску 10 і 11 жніўня.
Падазраванымі праходзяць 99 чалавек. Паводле сьледзтва, зафіксавана пашкоджаньне тратуарнай пліткі і лавак, у якасьці прыладаў злачынства пазначаны «сьмецьцевыя кантэйнэры, камяні і бутэлькі».
ЖЛОБІН. На шматтысячны мітынг прыйшлі старшыня райвыканкаму і начальнік мясцовай міліцыі
Шматтысячны мітынг праходзіць у Жлобіне. На сустрэчы прысутнічаюць старшыня райвыканкаму і начальнік мясцовай міліцыі.
Людзі задаюць пытаньні наконт жорсткіх затрыманьняў мясцовых жыхароў, у тым ліку і падлеткаў, скандуюць «Выпускай», «Фашысты» ў бок міліцыі, запрашаюць начальства «адмовіцца ад сваіх кармушак і перайсьці на бок народу», скандуюць «Сыходзь».
Людзі сказалі, што пакідаюць за сабой права на мірныя мітынгі, калі ня будуць выкананыя іх патрабаваньні: выпусьціць палітзьняволеных, справядлівыя выбары, адстаўка Лукашэнкі і мясцовых чыноўнікаў.
Начальнік міліцыі сьцьвярджаў, што міліцыя нікога ня біла, але прыйшлі людзі, якія сядзелі ў ізалятары часовага ўтрыманьня, і паказалі свае траўмы. Таксама людзі зьняпраўдзілі інфармацыю начальніка міліцыі, што толькі 6 чалавек трапілі ў шпіталь пасьля зьбіцьця АМАПам.
«Наша галоўнае пытаньне, ці будзе мірная перадача ўлады Ціханоўскай як абранаму прэзыдэнту», — кажуць людзі.
Старшыня райвыканкаму адказаў, што на гэтае пытаньне адказала ЦВК. Людзі пачалі крычаць «Ганьба», і начальнік міліцыі ды старшыня гарвыканкаму хутка сышлі.
Ля Дому ўраду людзі скандуюць «Сыходзь!», «Трыбунал!». Музыка грае на валынцы
Ля Дома ўраду ў Менску па-ранейшаму спакойна, без інцыдэнтаў. Людзей на Плошчы незалежнасьці паболела, цяпер назіральнікі ацэньваюць колькасьць прысутных у 10 тысяч. Людзі стаяць ужо некалькі гадзінаў і патрабуюць размовы з прадстаўнікамі ўлады. Яны скандуюць «Мы ня сыйдзем!» і «Размова!».
Ніякага мітынгу няма, але людзі час ад часу аплядуюць і выгукваюць: «Верым, можам, пераможам!», «Сыходзь!», «Трыбунал!». Частка людзей сядзіць на зямлі перад помнікам Леніну. Прыйшоў музыка, які грае на валынцы.
МАГІЛЁЎ. Калёнаў дэманстрантаў прыйшла да ізалятара
Да магілёўскага ізалятара прыйшла калёна пратэстоўцаў супраць гвалту падчас мірных пратэстаў у Беларусі. Сабралася пад 2 тысячы чалавек. Людзі вітаюць вызваленых, якія трапілі ў ізалятар за пратэст супраць вынікаў выбараў. Падыходы да ізалятара ачэпленыя экіпаванымі міліцыянтамі.
Дэпутату Эўрапарлямэнту Робэрту Бедраню адмовілі ва ўезьдзе ў Беларусь.
Робэрт Бедрань, які зьяўляецца кіраўніком дэлегацыі Эўрапарлямэнту па сувязях зь Беларусьсю, і дакладчык Эўрапарлямэнту па Беларусі Пятрас Аўштравічус плянавалі наведаць Беларусь 14–16 жніўня, каб ацаніць сытуацыю пасьля выбараў, сустрэцца з затрыманымі, прадстаўнікамі ўладаў, няўрадавых арганізацый і недзяржаўных СМІ. Пакуль невядома, ці будзе Аўштравічус спрабаваць прыехаць у Беларусь адзін.
«Органы, якія прынялі рашэньне аб адмове ва ўезьдзе, не абавязаныя інфармаваць аб прычынах прыняцьця такіх рашэньняў», — паведаміў прадстаўнік Дзяржаўнага памежнага камітэту Антон Бычкоўскі. Цалкам чытайце тут.
Беларусь перадала Расеі 32 затрыманых наймітаў ПВК «Вагнэр»
У Расею вярнуліся 32 найміты прыватнай вайсковай кампаніі «Вагнэр». Ім «не пагражае крымінальны ці іншы працэсуальны перасьлед», паведамляе «Інтэрфакс» са спасылкай на сваю крыніцу. 33-і затрыманы грамадзянін Расеі, які мае таксама беларускае грамадзянства, застаўся ў Беларусі.
Гэта адбылося паводле хадайніцтва Генэральнага пракурора Расейскай Фэдэрацыі і ў адпаведнасьці зь Менскай Канвэнцыяй аб прававой дапамозе. Паведамляецца, што кампэтэнтныя органы Расеі працягнуць разьбірацца з сытуацыяй, якая склалася вакол гэтых грамадзянаў. Цалкам чытайце па спасылцы.
Прыкра. У Зяленскага адрэагавалі на выдачу ў Расею затрыманых у Беларусі вагнэраўцаў
Украіна з прыкрасьцю ўспрыняла гэта рашэньне ўладаў Беларусі. «Безумоўна, Рэспубліка Беларусь — незалежная дзяржава з уласнай пазыцыяй, але ўкраінскі бок чакаў больш юрыдычна карэктнага і зважанага рашэньня», — заявілі ў Офісе прэзыдэнта Ўкраіны. Цалкам чытайце па спасылцы.
Экс-старшыня Вярхоўнага Савету Беларусі зьвярнуўся да кіраўнікоў краін сьвету. ВІДЭА
Сямён Шарэцкі, сьпікер апошняга дэмакратычна абранага ў 1996 годзе парлямэнту Беларусі, просіць кіраўнікоў дэмакратычных дзяржаў дапамагчы беларускаму народу ў барацьбе за свабоду.
Пасьля рэфэрэндуму 1996 году Вярхоўны Савет 13-га скліканьня быў распушчаны. Празь некалькі гадоў Сямён Шарэцкі эміграваў і цяпер жыве ў ЗША.
Журналісты дзяржаўнага радыё заявілі, што далучаюцца да страйку
У двары Дому радыё на Чырвонай, 4 супрацоўнікі Першага нацыянальнага каналу беларускага радыё запісалі відэазварот, у якім паведамілі, што далучаюцца да агульнанацыянальнага страйку. Яны заклікалі спыніць гвалт і правесьці сумленныя выбары.
Каманда адправіла запыт на імя галоўнага дырэктара Антона Васюкевіча і старшыні Белтэлерадыёкампаніі Івана Эйсманта. У ім супрацоўнікі просяць скарыстацца правам на страйк для абароны сваіх нацыянальных інтарэсаў і прад’яўляюць шэраг патрабаваньняў. Цалкам чытайце тут.
Міністар інфармацыі — журналістам: «Улада мяняецца на выбарах, а не на рэвалюцыях»
Кіраўнік Міністэрства інфармацыі Ігар Луцкі на сустрэчы зь дзяржаўнымі і недзяржаўнымі журналістамі 14 жніўня заклікаў іх да «канструктыўнага дыялёгу, які паслужыць далейшым зносінам і прадухіленьню эскаляцыі канфліктных сытуацый», паведамляе БелаПАН.
«Мы супраць неабгрунтаванага гвалту ня толькі ў дачыненьні да журналістаў, але і ўсіх грамадзян», — сказаў Луцкі на сустрэчы, на якой прысутнічала і прадстаўніца Міністэрства ўнутраных спраў Вольга Чамаданава. Цалкам чытайце тут.
Акцыя салідарнасьці зь Беларусьсю ў Грузіі. Фатафакт
ГОРАДНЯ. Людзі ідуць пад 70-мэтровым бел-чырвона-белым сьцягам
У Горадні калёна дэманстрантаў крочыць па горадзе пад бел-чырвона-белым сьцягам 70 мэтраў даўжынёй. Людзі дайшлі да філярмоніі і разышліся. Дамовіліся сустрэцца 15 жніўня ў 14:00 на плошчы Леніна.
Лукашэнка прабіў болевы парог нацыі, — палітычны аналітык Юры Дракахруст
Украінцы расказваюць, што сапраўдны Майдан там паўстаў не тады, калі Януковіч не падпісаў асацыяцыю з ЭЗ, а калі ў Кіеве жорстка зьбілі моладзь. На наступны дзень на Майдан выйшла паўмільёна чалавек.
Болевы парог у беларусаў вышэйшы, чым ва ўкраінцаў. Але Лукашэнка ўсё ж здолеў яго прабіць стралянінай на вуліцах, гранатамі, а самае галоўнае — зьверствамі ў засьценках Акрэсьціна і Жодзіна.
Гэтага народ ужо ня вытрымаў. І прычым па ўсёй краіне. Цікавае адрозьненьне ад Украіны — у рэакцыі няма ніякіх адрозьненьняў паміж усходам і захадам краіны, Беларусь вельмі аднародная.
Яна такой была ў 1994 годзе, калі дружна палюбіла Лукашэнку, яна такой жа засталася і цяпер, калі гэтак жа дружна адвярнулася ад яго, — мяркуе палітычны аналітык Свабоды Юры Дракахруст.
ВІЦЕБСК. Шматлюдная калёна працягвае шпацыр па горадзе
У Віцебску калёна зь некалькіх тысяч чалавек працягвае шпацыр па горадзе. Людзі ідуць з кветкамі і нацыянальнай сымболікай. Аўтамабілісты вітаюць іх сыгналамі, паказваюць з вокнаў бел-чырвона-белыя сьцягі.
