Францыя выступіла з заявай наконт неабгрунтаваных арыштаў у Беларусі і выгнаньня актывістаў з краіны
«Францыя самым рашучым чынам асуджае неабгрунтаваныя арышты і практыку прымусовага выгнаньня ў апошні час некалькіх сябраў Каардынацыйнай рады, а таксама многіх маніфэстантаў. Сытуацыя са спадарыняй Калесьнікавай павінна быць цалкам патлумачанай»,— гаворыцца ў заяве амбасады Францыі ў Менску.
«Мы заклікаем беларускія ўлады неадкладна пакласьці канец гэтым дзеяньням, вызваліць усіх неабгрунтавана затрыманых і пачаць ўсёабдымны нацыянальны дыялёг зь беларускім грамадзтвам, да якога мы заклікаем беларускія ўлады з 9 жніўня 2020 года. Мы нагадваем аб нашай прыхільнасьці да свабоды выказваньня меркаваньняў і да права на правядзеньне маніфэстацый, а таксама да захаваньня палітычных правоў і асноўных свабодаў.
У гэтай сувязі, Францыя нагадвае пра сваю падтрымку хуткага ўвядзеньня Эўрапейскім Зьвязам санкцый у адносінах да асобаў, адказных за рэпрэсіі супраць беларускага народу і за фальсыфікацыю выбараў, якая адбылася 9 жніўня 2020 года».
Крэмль: пакуль рана казаць пра дату візыту Лукашэнкі ў Расею
Пакуль рана казаць пра дату візыту Аляксандра Лукашэнкі ў Расею, заявіў агенцтву «РИА Новости» прэс-сакратар прэзыдэнта Расеі Дзьмітрый Пяскоў.
Раней дыпляматычная крыніца ў Маскве паведаміла агенцтву, што візыт Лукашэнкі ў Расею заплянаваны на 14 верасьня.
«Расея паглынаць Беларусь не зьбіраецца»,— прэсавы сакратар Пуціна пра візыт Лукашэнкі ў Маскву
Тэмы аб паглынаньні Расеяй Беларусі не стаіць, у тым ліку падчас будучага візыту Аляксандра Лукашэнкі ў Маскву, паведаміў прэс-сакратар прэзыдэнта Расеі Дзьмітрый Пяскоў.
Раней дыпляматычныя крыніцы паведамілі агенцтву «РИА Новости», што візыт кіраўніка Беларусі заплянаваны на 14 верасьня.
«Ніякіх зьліцьцяў, паглынаньняў і гэтак далей быць ня можа як вынік візыту. Гэта абсалютная лухта. Візыт важны, асабліва з улікам тых дзён, якія перажывае Беларусь. Нашы адносіны асаблівага партнэрства, саюзьніцкія, шматвэктарныя», — сказаў Пяскоў журналістам.
На парадку дня — гандлёва-эканамічнае супрацоўніцтва, запазычанасьці, энэргарэсурсы, пастаўкі нафты, газу, а таксама пытаньні інтэграцыі ў рамках саюзнай дзяржавы, ЭАЭС і СНД, падсумаваў прадстаўнік Крамля.
У Менску затрымалі адваката Ільлю Салея, — Каардынацыйная рада
Выканаўчы сакратар Каардынацыйнай рады Іван Краўцоў паведаміў, што сёньня затрымалі адваката Ільлю Салея.
«Цяпер мы найбольш перажываем за нашых калег. Сёньня ў нас у штабе прайшоў ператрус. Затрымалі Максіма Знака, таксама затрымалі адваката Ільлю Салея, які таксама актыўна ўдзльнічаў у нашай працы», — сказаў Іван Краўцоў у інтэрвію ўкраінскай службы Радыё Свабода.
Ён заклікаў максымальна падтрымаць іх, каб яны выйшлі на волю.
Затрыманьнне Салея Свабодзе пацьвердзілі ў штабе Віктара Бабарыкі.
Ільля Салей — юрыст адвакацкага бюро Borovtsov & Salei. Быў адным з адвакатаў Віктара Бабарыкі.
Месяц беларускай рэвалюцыі. Папярэднія высновы
Піша палітычны аналітык Валер Карбалевіч
Сёньня роўна месяц, як Беларусь жыве ва ўмовах рэвалюцыі. Яна здарылася нечакана для ўсіх, у тым ліку для беларускіх і замежных палітыкаў і экспэртаў. Акцыі пратэсту прагназавалі ўсе, але мала хто чакаў такога іх маштабу, зацятасьці і працягласьці.
Сьцісла
- Першыя тры дні пасьля выбараў Беларусь перажала кароткую грамадзянскую вайну.
- Нават калі беларуская рэвалюцыя закончыцца паразай, яна ўсё роўна ўвойдзе ў гісторыю і будзе мець вялізны ўплыў на далейшае разьвіцьцё краіны. Бо рэвалюцыі не праходзяць бясьсьледна.
- За апошнія тры месяцы была фактычна сфармаваная грамадзянская супольнасьць, адбыўся завяршальны працэс фармаваньня беларускай нацыі.
- Здаецца, самы небясьпечны для кіроўнага рэжыму момант, пік рэвалюцыі ўжо мінуў. То былі першыя 10 дзён пасьля выбараў.
- Адбываецца працэс эрозіі тых карпаратыўных інстытутаў, на якія абапіраўся рэжым, дзяржаўны апарат.
- Пакуль існуе часовая раўнавага і пэўны палітычны тупік. Паколькі Лукашэнка адмаўляецца ад перамоваў, то зыход палітычнага крызісу можа адбыцца толькі ў выніку абсалютнай перамогі аднаго з бакоў канфлікту.
- Аляксандар Лукашэнка, які чвэрць стагодзьдзя зьяўляўся гарантам беларускай стабільнасьці, раптам стаў галоўным чыньнікам дэстабілізацыі Беларусі.
- Падзеі апошняга месяца нанесьлі зьнішчальны ўдар па міжнароднай суб’ектнасьці Беларусі.
У Крамлі не пагадзіліся з Лукашэнкам, што «беларускія падзеі могуць адбыцца і ў Расеі»
Прэс-сакратар Уладзімера Пуціна не пагадзіўся з заявай Аляксандра Лукашэнкі, што падзеі, падобныя беларускім, могуць адбыцца і ў Расеі.
«Я б тут не пагадзіўся зь нейкімі паралелямі. Хоць у нас і ёсьць саюзная дзяржава, якую мы вельмі шануем, усё ж такі мы дзьве розныя краіны, мы дзьве розныя сувэрэнныя дзяржавы, — сказаў Дзьмітрый Пяскоў.
«У нас іншая палітычная культура, у нас іншы палітычны ляндшафт, іншыя палітычныя тэндэнцыі. Таму тут нейкія абагульненьні, мне здаецца, былі б няслушнымі», — дадаў Пяскоў.
«Ведаеце, мы да чаго прыйшлі разам з расейскім істэблішмэнтам і кіраўніцтвам? Калі сёньня Беларусь абрынецца, наступная будзе Расея», — сказаў Аляксандар Лукашэнка 8 верасьня ў інтэрвію расейскім СМІ.
Алексіевіч расказала журналістам, як да яе ў кватэру ламіліся невядомыя
Сьвятлана Алексіевіч сустрэлася з журналістамі пасьля таго, як у яе кватэру настойліва намагаліся трапіць невядомыя.
Па словах пісьменьніцы, ад самай раніцы хтосьці бясконца барабаніў у дамафон і яна небеспадстаўна ўстрывожылася.
«Пасьля таго, як забралі Максіма Знака, больш нікога ў прэзыдыюме Каардынацыйнай рады не засталася, — патлумачыла Нобелеўская ляўрэатка. — Але магу сказаць, што рада будзе працаваць, людзей, насуперак запалохваньням, далучаецца ўсё больш. Апусьцелыя месцы зоймуць новыя асобы».
Паводле Сьвятланы Алексіевіч, цяпер галоўная задача — зрабіць усё, каб пазьбегнуць трагічнага разрыву паміж беларусамі.
«Вы ж бачыце, як асьцервянела размаўляе пэўная частка грамадзтва, — зьвярнула ўвагу яна. — Хочацца, каб гэта ўбачыла і ўлада. Лукашэнка кажа, што не зьбіраецца дамаўляцца з вуліцай. Але вуліца — гэта і ёсьць народ. Ня тыя, каго ён сам прызначыў „народам“, а ўсе мы — настаўнікі, мэдыкі, айцішнікі. Увесь сацыяльны зрэз. А пыха ўлады якраз прыводзіць да небясьпечнага разрыву. Як бы не спрабавалі ягоныя прыслужнікі сьцьвярджаць, што выходзяць наркаманы і забойцы, увесь сьвет бачыць зусім іншае — цудоўныя, адухоўленыя твары сапраўдных беларусаў».
Раней Сьвятлану Алексіевіч выклікалі на допыт у Сьледчы камітэт з нагоды крымінальнай справы аб спробе «захопу ўлады» Каардыннацыйнай радай. Але яна адмовілася сьведчыць супраць сябе і даваць падпіску аб неразгалошваньні.
Памежны камітэт адрэагаваў на заявы Раднянкова і Краўцова ў Кіеве
Афіцыйны прадстаўнік Памежнага камітэту Беларусі Антон Бычкоўскі адказаў Свабодзе на пытаньне аб іх афіцыйнай рэакцыі на заявы ў Кіеве прадстаўнікоў Каардынацыйнай Рады Антона Раднянкова і Івана Краўцова.
«Уся наяўная ў Дзяржаўным памежным камітэце інфармацыя пра затрыманьне М.Калесьнікавай і перасячэньне мяжы А.Раднянковым і І.Краўцовым па стане на бягучы момант дадзена грамадзкасьці і СМІ ў поўным аб'ёме.
Лягічна, каб вэрсію падзей, выкладзеную на прэс-канфэрэнцыі Раднянковым і Краўцовым, камэнтавалі яны ж.
Палеміка ў гэтым пытаньні ня можа весьціся галаслоўнымі і нічым не падмацаванымі заявамі або абвінавачаньнямі, і тым больш з-за мяжы.
Што тычыцца месцазнаходжаньня і прававой ацэнкі дзеяньняў Марыі Калесьнікавай, то гэтая інфармацыя будзе дадзена пазьней».
Толькі 17% жыхароў Расеі хочуць аб’яднаньня зь Беларусьсю, — апытаньне
Больш за 40 адсоткаў жыхароў Расеі ня хочуць абʼяднаньня зь Беларусьсю і аддаюць перавагу добрасуседзкім адносінам зь ёю. Гэта вынікае з апытаньня Усерасейскага цэнтру грамадзкай думкі (ВЦИОМ).
- За саюзную дзяржаву выказаліся 22% рэспандэнтаў.
- 17% лічаць, што Беларусь павінна ўвайсьці ў склад Расеі на правах аднаго або некалькіх рэгіёнаў.
- 1% апытаных хацелі б, каб Расея ўвайшла ў склад Беларусі.
Апытаньне праводзілася 20 жніўня праз тэлефон сярод 1,6 тысячы расейцаў, старэйшых за 18 гадоў.
Паводле дадзеных сацыялягічнага дасьледаваньня Беларускай аналітычнай майстэрні Андрэя Вардамацкага, калі ў пачатку 2019 года пад саюз з Расеяй выказваліся больш за 60 адсоткаў жыхароў Беларусі, то да сьнежня гэтая лічба ўпала амаль да 40 працэнтаў. У той жа час узмацніліся праэўрапейскія настроі: колькасьць прыхільнікаў уступленьня Беларусі ў Эўразьвяз вырас з 24 да 32 адсоткаў.
Прэс-сакратар Міністэрства спорту і турызму пакінуў пасаду
Прэс-сакратар Міністэрства спорту і турызму Беларусі пакінуў пасаду. Пра гэта Ўладзімер Несьцяровіч напісаў пра гэта ў Facebook, паведамляе «Прессбол».
«На гэтым усё. Сышоў з спорту і турызму. Сілы вычарпаліся. Прыходжу ў сябе», — паведаміў Несьцяровіч.
На мінулым тыдні вядомыя беларускія спартоўцы зьвярнуліся да сваіх калегаў з просьбай абʼяднацца і падтрымаць сваёй пазыцыяй акцыі пратэсту супраць фальсыфікацыі прэзыдэнцкіх выбараў у Беларусі, якія апошнія 4 тыдні праходзяць па ўсёй краіне.
Таксама яны заявілі аб стварэньні Вольнага абʼяднаньня спартоўцаў Беларусі і заклікаюць іншых да яго далучацца.
Лукашэнка прызначыў новага генэральнага пракурора
Кіраўнік Беларусі Аляксандар Лукашэнка 9 верасьня прызначыў Андрэя Шведа, які да цяперашняга часу ўзначальваў Дзяржаўны камітэт судовых экспэртыз, Генэральным пракурорам Беларусі, паведамляе БелТА.
«Напэўна, гэта натуральны працэс пасьля выбараў. Як у любой дзяржаве. Асноўны касьцяк, ва ўрадзе асабліва, мы сфармавалі да выбараў, каб людзі бачылі, з кім прэзыдэнт плянуе працаваць пасьля выбараў. Ну і натуральна, як гэта прынята казаць, пэўная даводка заўсёды існуе пасьля выбараў», — сказаў Лукашэнка аб прызначэньні.
Швед заменіць Аляксандра Канюка, які прапрацаваў на гэтай пасадзе 9 гадоў. Лукашэнка адзначыў, што Канюк выказаў жаданьне папрацаваць на дыпляматычнай службе.
Журналістку асудзілі на 10 сутак на падставе фотаздымку ў сацсетках
9 верасьня ў судзе Маскоўскага раёну Менска працягнулі разглядаць справу ў дачыненьні да Валерыі Ўласік, дачкі рэдактаркі Tut.by Галіны Ўласік.
Напярэдадні апэратыўнікі ў цывільным і масках прыйшлі ў кватэру сям’і з ператрусам.
Валерыю Ўласік абвінавацілі ва ўдзеле ў несанкцыянаваным пікеце 14 жніўня. Падставай паслужыў здымак у сацсетках, дзе яна стаіць з кветкамі ў руках, а побач іншая дзяўчына з плякатам «Гэта краіна для жыцьця».
Уласік заявіла, што не прызнае сябе вінаватай. Кажа, праходзіла побач, убачыла дзяўчат з плякатам, сфатаграфавалася і пайшла далей.
Аднак судзьдзя Вольга Малашэнка прызначыла ёй 10 сутак арышту.
Раней былі падазрэньні, што Валерыя Ўласік можа быць фігуранткай справы аб масавых беспарадках, але ніякіх камэнтароў Сьледчы камітэт з гэтай нагоды не дае.
Марыя Калесьнікава знайшлася ў менскім СІЗА на вуліцы Валадарскага
Марыя Калеснікава знаходзіцца ў СІЗА № 1 на Валадарскага, паведаміў Tut.by бацька Марыі Аляксандар Калесьнікаў.
УЖЫВУЮ Месяц пратэстаў. Калесьнікава на Валадарскага. Ціханоўская ў Варшаве. Знака затрымалі. Ператрусы ў Каардынацыйнай радзе
«Кіраўнік сьледчай групы галоўнага следчага ўпраўлення СК Васілюк патэлефанаваў мне і паведаміў, што яна арыштаваная. Прапанаваў прывезьці перадачу», — сказаў Калесьнікаў.
У штабе Віктара Бабарыкі таксама пацьвердзілі, што Марыя Калесьнікава знаходзіцца ў Менскім СІЗА на вуліцы Валадарскага.
7 верасьня Марыю Калесьнікаву затрымалі на вуліцы супрацоўнікі ў цывільным. 8 верасьня, яе а таксама прэс-сакратара Каардынацыйнай рады Антона Раднянкова і выканаўчага сакратара КР Івана Краўцова прадстаўнікі сілавых ведамстваў спрабавалі прымусова вывезьці ва Ўкраіну, аднак Калесьнікава парвала свой пашпарт і была зноў затрыманая.
Раднянкоў і Краўцоў здолелі выехаць ва Ўкраіну. Месца знаходжаньня Калесьнікавай было невядомае дагэтуль.
Клюбу плаваньня Аляксандры Герасімені не працягваюць дамову арэнды за яе палітычную пазыцыю
«Школа № 2 не плянуе падпісваць з намі дамову і ўжо запаўняе групы сваімі дзецьмі са школы. У такой сытуацыі мы апынуліся з-за нашай палітычнай пазыцыі, якая заключаецца ў тым, што мы не падтрымліваем гвалт і дзейны рэжым», — сказала шматразовая прызёрка Алімпійскіх гульняў у відэазвароце, які разьмясьціў Tut.by
Лукашэнка прызначыў новага генэральнага пракурора. Ім стаў Андрэй Швед. Да гэтага ён быў старшынёй Дзяржкамітэту судовых экспэртызаў.
Прэмʼер Польшчы: Мы прадставім эканамічны плян для беларускага народу
Падчас адкрыцьця ў Варшаве «Беларускага дому» і сустрэчы са Сьвятланай Ціханоўскай Матэвуш Маравецкі заявіў, што Эўразьвяз «падтрымлівае беларускі народ у ягоным імкненьні да жыцьця ў свабодзе і дэмакратыі».
«Неўзабаве мы прадставім эканамічны плян для беларускага народу і беларускай дзяржавы, які мае на мэце паказаць, што Эўропа адкрытая на Беларусь і беларускі народ», — сказаў Маравецкі.
Алексіевіч: «Замест выдраных з нашых шэрагаў прыйдуць сотні іншых»
Нобэлеўская ляўрэатка, старшыня Беларускага Пэн-цэнтру, выступіла з заявай. Гэта адбылося пасьля таго, як ранкам невядомыя людзі званілі ў дамафон і на тэлефонны нумар пісьменьніцы.
«Ужо не засталося нікога з маіх сяброў-аднадумцаў у прэзыдыюме Каардынацыйнай рады. Усе ці ў турме, ці выкінутыя за мяжу. Сёньня ўзялі, апошнім, Максіма Знака.
Спачатку ў нас скралі краіну, выкрадаюць лепшых з нас. Але замест выдраных з нашых шэрагаў прыйдуць сотні іншых. Паўстаў не Каардынацыйны камітэт. Паўстала краіна. Я хачу паўтарыць тое, што гавару заўжды. Мы не рыхтавалі перавароту. Мы хацелі не дапусьціць расколу ў нашай краіне. Мы хацелі, каб у грамадзтве пачаўся дыялёг. Лукашэнка кажа, што ня будзе размаўляць з вуліцай, а вуліца — гэта сотні тысяч людзей, якія кожную нядзелю і кожны дзень выходзяць на вуліцу. Гэта ня вуліца. Гэта народ.
Людзі выходзяць на вуліцу са сваімі маленькімі дзецьмі, таму што яны вераць, што яны перамогуць.
Яшчэ я хачу зьвярнуцца да рускай інтэлігенцыі, назавём гэта так па старой звычцы. Чаму вы маўчыце? Мы чуем толькі рэдкія галасы ў падтрымку. Чаму вы маўчыце, калі бачыце, як растоптваюць маленькі горды народ? Мы ўсё яшчэ вашы браты.
А свайму народу я хачу сказаць, што я люблю яго. Я ганаруся ім.
Вось зноў нехта невядомы звоніць у дзьверы...»
«Паводзяць сябе бесцырымонна і з выклікам». МУС Беларусі апраўдвае разгоны і затрыманьні жанчын
«У Менску ля цэнтральнага ўваходу Камароўскага рынку сабраліся прыкладна 250 грамадзянаў, якія прайшлі калёнай па плошчы Якуба Коласа, вуліцы Куйбышава і праспэкце Машэрава. Не абышлося без інцыдэнтаў. Агрэсіўна настроеныя людзі, у тым ліку жанчыны, абступілі аднаго з супрацоўнікаў міліцыі. Спачатку яны крычалі, правакавалі яго, а затым сарвалі балаклаву. Паглядзіце на відэа, як бесцырымонна і з выклікам яны сябе паводзяць. Ім усё роўна хто перад імі», — напісала афіцыйная прадстаўніца МУС Вольга Чамаданава.
Акцыя салідарнасьці на вуліцы Ціміразева ў Менску
МУС: учора затрымалі 121 чалавека, у зьняволеньні 106
Як паведамляе Міністэрства ўнутраных справаў, учора было 10 пратэставых акцыяў, сумарна ня больш за 500 удзельнікаў.
Пры тым шэсьце ад менскай Камароўкі да праспэкту Машэрава сабрала 250 удзельнікаў. Гэта значыць, на астатнія 9 акцыяў прыпадае яшчэ 250 удзельнікаў, калі верыць сілавікам.
На скрыжаваньні Чырвонай і Машэрава, піша МУС, «агрэсіўна настроеныя людзі, у тым ліку жанчыны, абступілі аднаго з супрацоўнікаў міліцыі, яны крычалі, правакавалі міліцыянта, а затым сарвалі зь яго балаклаву». Гэта адбылося падчас