Аляксея Кудзіна абвінавачваюць у супраціўленьні супрацоўніку органаў унутраных справаў, яму пагражае да 5 гадоў пазбаўленьня волі.
Працэс меў пачацца 19 лістапада 2020 году, аднак перад пачаткам паседжаньня спартовец, які быў пад падпіскай пра нявыезд, зьнік. Неўзабаве ён разьмясьціў у сацсетках пост, што знаходзіцца за мяжой, а яшчэ празь нейкі час яго затрымалі ў Маскве на запыт беларускага боку. Пасьля шэрагу судоў і скаргаў Расея выдала Аляксея Кудзіна Беларусі.
На пачатку пасяджэньня Аляксей Кудзін, які знаходзіцца пад вартай, хадайнічаў аб спыненьні крымінальнай справы ў сувязі з прымірэньнем бакоў. Аднак з гэтым пагадзіўся толькі пацярпелы Яндола. Іншы пацярпелы і пракурор выступілі супраць, таму хадайніцтва адхілілі.
Раней Кудзін аплаціў маральную кампэнсацыю сілавікам, прызнаным пацярпелымі: Яндолу (15 тысяч рублёў) і Зорыну (4 тысячы).
Ураджэнец Маладэчна Аляксей Кудзін займаецца адзінаборствамі з 15 гадоў. У 21 год стаў чэмпіёнам сьвету ў муай-тай, а яшчэ праз год — у кікбоксінгу. За сваю кар’еру выйграваў тытул чэмпіёна сьвету ў розных відах адзінаборстваў сем разоў. Акрамя таго, удзельнічаў у падрыхтоўцы супрацоўнікаў праваахоўных органаў. Некаторыя зь іх бралі ўдзел у яго затрыманьні ўвечары 10 жніўня.
Агулам ад дзеяньняў Аляксея Кудзіна ў рознай ступені тады пацярпелі пяцёра праваахоўнікаў. Сам баец настойваў, што не рабіў нічога супрацьзаконнага, быў вымушаны абараняцца ад дзеяньняў міліцыянтаў.
Затрымлівалі спартоўца байцы САХРу ўвечары 10 жніўня, калі ён паехаў у маладачанскі шпіталь для абсьледаваньня траўмаў. Ягоны аўтамабіль заблякавалі, самога яго аглушылі сьвятлашумавой гранатай, а затым стрэлілі тройчы ў грудзі з траўматычнай зброі.
На настуны дзень Аляксея Кудзіна вывезьлі з Маладэчна ў сьледчую турму № 8 Жодзіна. Праз два тыдні яго вызвалілі да суду — узамен на прызнаньне віны і запіс гэтага на відэа. Таксама ён кампэнсаваў пацярпелым міліцыянтам каля 20 тысяч рублёў маральнай шкоды. Нягледзячы на гэта, справу перадалі ў суд.
З Масквы ў Менск Аляксея Кудзіна даставілі самалётам 21 ліпеня, нягледзячы на пратэст Эўрапейскага суду ў правах чалавека, які забараніў перадаваць байца ўладам Беларусі.
