На памежным пераходзе ў польскай Кузьніцы выявілі кантрабанду з 485 тысяч пачкаў цыгарэт, схаваных у вокнах, паведамляе Падляская нацыянальная падатковая адміністрацыя.
33-гадовы беларус па дакумэнтах перавозіў у грузавіку пяць плястыкавых вокнаў з мэталічнымі рамамі. Аднак, як выявілі мытнікі падчас вобшуку, у вокнах былі схаваныя цыгарэты агульнай сумай каля 1,86 мільёна даляраў.
Калі б кантрабандныя цыгарэты прадалі на тэрыторыі Польшчы, то бюджэт краіны згубіў бы каля 3 мільёнаў даляраў нясплачаных падаткаў.
Кіроўцу грузавіка затрымалі. Супраць яго пачалі расьсьледаваньне. Яму пагражае ад штрафу да 5 гадоў пазбаўленьня волі.
