Дзяржаўны сакратар Савету бясьпекі Беларусі Аляксандар Вальфовіч пракамэнтаваў ідэю міжнароднага трыбуналу над цяперашнім кіраўніцтвам Беларусі за сьмерці і катаваньні людзей пасьля фальшывых выбараў 2020 году.
«Лёгіка іх прыярытэтаў зразумелая: чым горш для краіны — тым лепш. Чым больш абвінавачаньняў — тым больш выдадуць „пячэнек“. Што тычыцца чарговых мэсыджаў з нагоды так званага Нюрнбэрскага працэсу, дык недапушчальна чуць пра гэтую частачку нашай перамогі над фашызмам ад людзей, якія самі, па сутнасьці, здраднікі. Нагадаю, што працэс у Нюрнбэргу праходзіў у дачыненьні да нацыстаў, якія ажыцьцявілі змову з мэтай злачынных дзеяньняў. І якраз Ціханоўская, Латушка ды іншыя — першачарговыя фігуры для новага Нюрнбэргу», — заявіў Вальфовіч, якога цытуе БелТА.
Ён сказаў, што ў адпаведнасьці «зь беларускім заканадаўствам і сусьветнай працэсуальнай практыкай» яны ўжо абвінавачваюцца ў зьдзяйсьненьні крымінальных злачынстваў. Аляксандар Вальфовіч параіў ім задумацца над тым, як прыехаць у Беларусь і панесьці пакараньне з улікам раскаяньня.
11 кастрычніка ў Нюрнбэргу прайшла міжнародная прававая канфэрэнцыя, на якой разглядаліся «злачынствы рэжыму Лукашэнкі». У выніковай дэклярацыі заяўлена, што сабраныя дастатковыя прававыя падставы для пачатку крымінальных спраў паводле ўнівэрсальнай юрысдыкцыі.
Гаворка пра «злачынствы, зьдзейсьненыя службовымі асобамі рэжыму супраць чалавечнасьці». Зьмешчаны заклік аб стварэньні міжнароднага трыбуналу для іх расьсьледаваньня.
Дэклярацыя таксама заклікала не прызнаваць легітымнасьць Лукашэнкі і створаны ім урад, бо ні ён сам, ні ягоныя падначаленыя «ня маюць ні юрыдычнага, ні маральнага права прадстаўляць інтарэсы беларускага народу на міжнароднай арэне».
