Справу журналіста «Комсомольской правды в Беларуси» Генадзя Мажэйкі разглядаюць ў Менскім гарадзкім судзе. Працэс вядзе судзьдзя Тацьцяна Фалькоўская, якая нядаўна прысудзіла 8 гадоў калёніі экс-журналістцы БТ Ксеніі Луцкіной.
Палітзьняволенага абвінавачваюць паводле ч. 1 арт. 368 (абраза прэзыдэнта), ч. 1 арт. 130 (распальваньне расавай, нацыянальнай, рэлігійнай або іншай сацыяльнай варожасьці). На судзе ён віны не прызнаў, піша @mediazona_by.
Як піша «Спутник», у абвінавачваньні, якое зачытаў пракурор, сьцьвярджаецца, што «Мажэйка, праяўляючы амаральную зацікаўленасьць у экстрэмісцкай дзейнасьці, яе прыхільнікам і дзейнічаючы па матывах палітычнай і ідэалягічнай варожасьці, у пэрыяд з 23 чэрвеня 2020 года па кастрычнік 2021 года зьдзейсьніў шэраг злачынстваў».
Ён нібыта пісаў у інтэрнэце «нэгатыўныя, непрыстойныя і недапушчальныя» выказваньні на адрас Лукашэнкі, а на сустрэчы з дэпутатам Варанецкім, «парушаючы агульначалавечую мараль», праводзіў агітацыю супраць дзейнай улады.
Мажэйка нібыта сказаў тады, што з аўтаматам бегаць можа толькі вар’ят.
Журналіст віну не прызнаў і заявіў, што на той сустрэчы пра Лукашэнку выказваўся не ён. У адрас улады ніякіх абразьлівых выразаў ён не дапускаў і прыхільнікам апазыцыі не зьяўляецца.
Першапачаткова Міністэрства ўнутраных спраў заяўляла, што Мажэйку затрымалі ў Менску. Па іх вэрсіі, журналіст хацеў з Расеі вылецець у трэцюю краіну, але пры спробе зрабіць гэта даведаўся, што быў прызнаны непажаданым на тэрыторыі Расеі. Таму нікуды вылецець ён ня здолеў і, як сьцьвярджалася, вярнуўся ў Беларусь, дзе яго затрымалі.
Галоўны рэдактар «КП» Уладзімір Сунгоркін адзначаў, што Мажэйку правялі ў самалёт на рэйс у Менск, там яго сустрэлі супрацоўнікі КДБ Беларусі і затрымалі.
Сам Генадзь расказваў сукамернікам, што ён паехаў у Маскву і хацеў адтуль вылецець у іншую краіну, але яго затрымалі адразу ў аэрапорце супрацоўнікі ФСБ, пасьля чаго завезьлі на беларускую мяжу і перадалі КДБ Беларусі.
Да гэтага моманту невядома, за што менавіта затрымалі Мажэйку. Найбольш верагодна, што арышт журналіста зьвязаны з публікацыяй на сайце kp.by кароткай размовы з былой аднаклясьніцай Андрэя Зельцара, які загінуў у перастрэлцы з супрацоўнікамі КДБ, што штурмавалі яго кватэру. У апублікаваным на kp.by артыкуле аднаклясьніца станоўча характарызавала Зельцара. Сайт выданьня неўзабаве заблякавалі ў Беларусі, праз пэўны час перастала выходзіць і папяровая вэрсія беларускага выданьня «КП».
Доўгі час Мажэйка знаходзіўся ў жодзінскай турме. Пазьней яго перавялі на «Валадарку».
