«У нейкі момант, цалкам магчыма, гэта адбудзецца. Але дакладна не цяпер», — сказаў ён, адказваючы на пытаньне журналістаў пра пляны Белага дома наконт магчымага зьмяненьня законаў аб зброі.
Трагедыя адбылася ўвечары 1 кастрычніка, калі 64-гадовы Стывэн Пэдак адкрыў агонь па гледачах падчас канцэрту кантры-музыкі ў Лас-Вэгасе, з акна свайго нумара на 32-м паверсе гатэлю «Мандалэй Бэй».
Ахвярамі стральбы сталі 59 чалавек, больш за 500 атрымалі раненьні рознай ступені цяжкасьці. Стралок скончыў жыцьцё самагубствам, калі паліцыя пачала ўзломваць дзьверы нумару. Пазьней паліцыя выявіла ў гатэльным нумары і ў доме Пэдака некалькі дзясяткаў адзінак зброі.
Трагедыя ў Лас-Вэгасе: што вядома пра злачынцу
Дональд Трамп пракамэнтаваў трагедыю ў Лас-Вэгасе ўвечары ў аўторак, пасьля вяртаньня ў Вашынгтон з Пуэрта-Рыка. Ён назваў гібель некалькіх дзясяткаў людзей «актам абсалютнага зла», паабяцаўшы, што раніцай у сераду ён прыедзе на месца масавага расстрэлу.
«Я паеду заўтра рана і буду ў Лас-Вэгасе, — сказаў прэзыдэнт ЗША. — Мы хочам наведаць некаторых з пацярпелых, хто цяпер папраўляецца. Пра гэта вельмі страшна нават думаць, вельмі страшна».
Стралка Дональд Трамп назваў «хворым і вар’ятам», заявіўшы, што падчас паездкі ён мае намер сустрэцца з прадстаўнікамі праваахоўных органаў і гарадзкіх уладаў.
