Прэзыдэнт Дональд Трамп сёньня паразмаўляў з прэзыдэнтам Расеі Ўладзімірам Пуцінам і павіншаваў яго з перамогай на выбарах. Раней інфармацыю пра віншаваньне падаў сайт Крамля.
У размове з журналістамі Трамп сказаў:
«Мы мелі тэлефонную гутарку з прэзыдэнтам Пуцінам, і я павіншаваў яго зь яго перамогай на выбарах. Гутарка была неабходная ў сувязі з тым, што мы, імаверна, сустрэнемся неўзабаве, вось жа мы можам абмеркаваць гонку ўзбраеньняў. Як вы ведаеце, ён заявіў, што не зацікаўлены ў гонцы ўзбраеньняў, гэта была адна зь першых яго заяваў пасьля выбараў. І мы выдаткавалі сёлета $ 700 млрд на нашу абарону, і гэта дазволіць нам быць мацнейшымі, чым кожная іншая краіна сьвету».
«Мы ніколі не дазволім, каб хто-небудзь нават блізка падышоў да таго, што маем мы», сказаў Трамп.
Прэзыдэнт ЗША паведаміў, што мерыцца абмеркаваць з Пуцінам, акрамя вайсковых пытаньняў, таксама сытуацыю ва Ўкраіне, у Сырыі і ў Паўночнай Карэі.
