30 жніўня прэмʼер-міністарка Літвы Інгрыда Шыманіце наведала прадстаўніцтва беларускай дэмакратыі ў Вільні, дзе абмеркавала са Сьвятланай Ціханоўскай сытуацыю ў Беларусі, удзел рэжыму Лукашэнкі ў вайне Расеі супраць Украіны, становішча беларусаў, якія зьехалі з прычыны рэпрэсій.
Ціханоўская: дэмакратычныя сілы дабіваюцца вываду расейскіх войскаў зь беларускай тэрыторыі
Сьвятлана Ціханоўская сустрэлася ў сваім офісе з прэмʼер-міністаркай Літвы Інгрыдай Шыманіце. Як паведаміла прэсавая служба Ціханоўскай, прэмʼер-міністарка паразмаўляла з камандай Офіса Ціханоўскай і прадстаўнікамі навастворанага Аб’яднанага пераходнага кабінэту.
Ёй расказалі пра тое, як адбываецца праца над кабінэтам, а таксама пра кампаніі, якія дэмакратычныя сілы праводзяць у падтрымку Ўкраіны.
«Абмеркавалі сытуацыю ў беларускай эканоміцы і наступствы санкцыяў, а таксама верагоднасьць поўнага ўступленьня арміі Беларусі ў вайну супраць Украіны. Ціханоўская падкрэсьліла, што беларускае грамадзтва катэгарычна не падтрымлівае вайну і супраць уступленьня беларускіх войскаў, нягледзячы на спробы ціску і антыўкраінскую кампанію. Дэмакратычныя сілы дабіваюцца вываду расейскіх войскаў зь беларускай тэрыторыі».
Ціханоўская расказала прэмʼер-міністарцы пра справу Мікалая Аўтуховіча і затрыманьне Мерыем Герасіменкі за выкананьне песьні «Акіяну Эльзы», пра падрыхтоўку пляну «Перамога» і праект «Беларускі гаюн», у якім да 30 000 чалавек зьбіраюць інфармацыю пра перамяшчэньні расейскіх і беларускіх войскаў. Яна таксама адзначыла важнасьць падтрымкі беларускіх СМІ і праваабаронцаў.
Акцэнт на візавых праблемах беларусаў
Падчас гутаркі бакі абмеркавалі сытуацыю з шэнгенскімі візамі.
«Ціханоўская падкрэсьліла важнасьць працягу выдачы беларусам візаў. Пры гэтым павінны быць пашыраныя індывідуальныя санкцыйныя сьпісы, каб сілавікі, чыноўнікі, памагатыя рэжыму ня мелі магчымасьці свабодна падарожнічаць і зарабляць у Эўразьвязе, як было раней. Ціханоўская папрасіла зьвярнуць увагу на беларускіх студэнтаў, многія зь якіх перад самым пачаткам навучальнага году маюць праблемы з атрыманьнем візаў. Разглядаецца магчымасьць стварэньня міжведамаснай групы з удзелам прадстаўнікоў дэмакратычных сілаў, каб вырашаць візавыя і міграцыйныя пытаньні.
Што заявіла Шыманіце
«Ад самага пачатку рэпрэсій у Беларусі, і асабліва з пачаткам вялікай хвалі рэпрэсій пасьля чарговых скрадзеных Лукашэнкам прэзыдэнцкіх выбараў у 2020 годзе, Літва стала часовым домам для беларусаў, вымушаных уцякаць са сваёй краіны. Запэўніваю вас, што гэтая пазыцыя не зьмянілася пасьля 24 лютага — мы будзем і далей рабіць усё, каб прадстаўнікі беларускіх дэмакратычных сіл і арганізацый грамадзянскай супольнасьці і СМІ былі ў бясьпецы ў Літве і маглі годна жыць і працаваць», — перадае словы прэмʼер-міністаркі яе прэс-служба.
Шыманіце адзначыла, што цяпер, калі вочы ўсяго сьвету прыкаваныя да Украіны, якая ваюе, Літва ня можа забываць і павінна працягваць падтрымліваць беларусаў у іх барацьбе за дэмакратыю.
«Літва будзе і далей імкнуцца захаваць справу свабоды Беларусі ў міжнародным парадку дня, падтрымлівала і будзе падтрымліваць патрабаваньні беларусаў аб спыненьні рэпрэсій у краіне, вызваленьні і поўнай рэабілітацыі палітвязьняў, правядзеньні свабодных і дэмакратычных выбараў», — заявіла прэмʼерка Літвы.
Сьвятлана Ціханоўская пракамэнтавала вынікі сустрэчы з Інгрыдай Шыманіце:
«Я падзякавала спадарыні Шыманіце за падтрымку Літвы, за цьвёрдасьць і пасьлядоўнасьць. Ужо два гады Літва працягвае прымаць беларускіх палітычных уцекачоў, рэпрэсаваных, беларускія кампаніі і недзяржаўныя арганізацыі. Літва заступаецца за беларусаў на міжнароднай арэне і не дае спакою памагатым рэжыму. У справе візаў я патлумачыла, чаму важна адрозьніваць беларусаў і рэжым. Нам важна ўзмацняць сувязі паміж Эўрапейскім Зьвязам і Беларусьсю. Пры гэтым важна выпрацаваць мэханізм, каб памагатыя рэжыму і прыхільнікі вайны не маглі злоўжываць адкрытасьцю Эўропы».
